【點評】《廉政行動2019》- 結局有「彩蛋」?!

短短五集的《廉政行動2019》就暫告一段落(迷之聲:因為下年又有!!),上片上一提呢套劇都有講過呢兩集預計會相當精彩,結果亦無令小編失望,反而有D覺得「唔夠喉」!呢兩集歐陽智(陳家樂飾)、沈泳君(陳瀅飾)查的係前政府高官靳東堯(鄭則仕飾)(成件案件係參考前政務司司長許仕仁的貪污案),原本仲有升職做總調查主任的「花姐」張嘉汶(滕麗名飾)一齊查呢件案,但劇情交代話佢身體有事所以要退出調查去養病,反而見證兩位徒弟的成長。



讀者可以參考以上片段。如果只係睇預告片的話,都會知道今集的關鍵證人係靳東堯的私人助理林瑞兒(賴慰玲飾)。因為有一幕係歐陽智一路追住林瑞兒,而林瑞兒就一路急步行出佢做野個棟大廈,之後就「頂唔順」調番轉頭鬧歐陽智。另外仲有一幕係靳東堯同佢的律師韓奕山(黃智賢飾)話要「摧毀呢個證人」。只係預告片會預計係廉政公署係調查過程入面查到靳東堯的私人助理身上,但原來係林瑞兒自己去廉政公署「爆料」,呢樣又真係估佢唔到,因為劇情暗地裡交代林瑞兒應該係靳東堯的情婦。不過,雖然調查對象係靳東堯,但佢今集的戲份其實唔多,所以Kent哥都無咩機會發揮。


反而今集查案而外的劇情令小編幾有印象。第一係曹永廉飾演的馬志強。佢就係沈泳君「契女」的親生阿爸,之前賭錢搞到要「返大陸」避債。今集佢叫做盡左佢做阿爸的最後責任,捐器官俾自己個女,但最後又因為避債而再離開自己個女。咁佢算唔算係一個「好老豆」呢?另外就係「花姐」張嘉汶倒下,幾集的劇情入面都講緊「花姐」係一個似「女強人」的人,但鐵人都會病,工作緊要亦或係身體緊要?而老朋友韓奕山的探病係呢兩集有特別意義,即使係工作方面有矛盾(因為佢係靳東堯案的律師),但友誼就超出左呢個層面。


《廉政行動2019》的結局當然係以Operation去結束啦,歐陽智同沈泳君呢對「最佳拍擋」就去到一間酒吧度捉人。之後同佢地一齊出動的同事就話佢地兩個唔似係扮緊一對情侶,反而係似一對真正的情侶。呢個會唔會係編劇俾觀眾的一個「彩蛋」呢?因為陳家樂同陳瀅呢對「緋聞情侶」係螢幕上又真係幾合襯,唔知你又覺唔覺呢?

Ref: TVB

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→