【功力大進】《倚天屠龍記》- 無忌哥哥同芷若妹妹終於成才!!!

隔左一段時間無講《倚天屠龍記》,自從張翠山(李東學飾)同殷素素(陳欣予飾)「仙遊」之後,主角張無忌開始過住「闖蕩江湖」的生活。先係武當山跟住太師父張三豐同咁多位師叔伯學藝同療傷,之後又輾轉去跟蝴蝶谷的「蝶谷醫仙」胡青牛學醫(仲叫做有得做下個實習醫生幫其他武林前輩療傷)。再經歷「蝴蝶谷之亂」後(金花婆婆加埋滅絕師太來襲),又做埋保鏢護送紀曉芙同楊逍個女楊不悔去搵番自己阿爸,終於張無忌「大個仔」啦(曾舜晞飾)!


讀者可以參考以上片段。最近兩集張無忌遇到存心去「昆」佢的朱長齡同佢個女朱九真,佢地好「俾心機」咁整左場「大龍鳳」出黎,就係為左可以係無忌身上收道「屠龍刀的料」,又話自己識得張無忌阿爸張翠山,仲將佢封左做「恩公」,之後又話自己收留左「金毛獅王」謝遜,搞到無忌以為自己可以同義父隔左咁耐重遇,點知所有野都係假!無忌仲搞到同朱長齡一齊跌左落山谷。


但無忌佢就因禍得福,跌左落山之後又差D俾朱長齡打,佢就閃左入去其中一個山洞(又好彩朱長齡個身太大入唔到去),穿過山洞去到一個世外桃源,個度又俾佢遇到一隻受傷的白猿。好心的無忌就用佢學到的醫術去幫個隻白猿,機緣巧合下俾佢拎到《九陽真經》。悟性極高的無忌就即刻開始學,學左一段時間終於可以將佢細細個中「玄冥神掌」的寒毒驅除,仲內力大增!!


另一邊箱,其中一位女主角周芷若都「大個女」(祝緒丹飾)(小編好期待陳鈺琪飾演的趙敏出場)。小編睇芷若妹妹係峨嵋派的遭遇就好似係睇緊「紀曉芙2.0」。點解會咁講呢? 芷若同紀曉芙都係峨嵋派入面的師妹(當然講緊唔同年代啦),兩個都係悟性極高又勤力,所以係武學造詣上都比其他師姐叻。咁叻人通常都有人「唔抵得」,佢地兩個都俾大師姐丁敏君敵視。大師姐就成日以大師姐之名去欺壓其他師妹,芷若妹妹搞到好似做奴婢咁樣。好彩滅絕師太(周海媚飾)知道芷若的潛力遠超其他師姐,經過一次偽裝「黑衣人」的考核之後,佢終於向芷若坦白,讚佢係「十年難得一見的美少女」(「十年不遇的奇才」先係),仲話會之後傳峨嵋派掌門個位俾佢!小編覺得好好呀,如果掌門之位係傳俾大師姐丁敏君呢D「惡毒女」就真係好差,「做人不要丁敏君」呀!


Ref: TVB

留言


請按此登錄後留言。未成為會員? 立即註冊
    快捷鍵:←
    快捷鍵:→