【打大佬?】《廉政行動2019》-劇力"急升"的兩集?!

因為通常星期六晚都要睇其他節目(其實係睇波),小編先叫做第一次坐定定睇哂成集《廉政行動2019》。如果講《廉政行動2019》可唔可以宣傳廉潔精神,咁答案係肯定的,始終劇集係圍繞呢樣野去「度身訂做」。但小編睇呢套節目的時候,盡量係當番佢係一套普通劇集去睇,個比喻就係好似小編睇《法證先鋒》係想知道法證呢份工係做D咩野,睇《廉政行動》就係想知多D廉政公署的調查主任係做D咩。


讀者可以參考以上片段。最新果集同嚟緊下星期果集的主題係「黃金枷鎖」,比起之前三集的節奏完全唔同。因為呢兩集係講緊歐陽智(陳家樂 飾)、沈泳君(陳瀅 飾)同埋張嘉汶(滕麗名 飾)三位廉政公署調查主任組成的三人小組去查前政府高官靳東堯(鄭則仕 飾)有無收受地產商華誌國際所提供的利益。呢兩集係改編七年前的前政務司司長許仕仁同新鴻基地產的案件。所以呢次調查的層次同金額同之前三集的案件都有好大分別。雖然話查案唔應該話有咩大細的分別,但對觀眾黎講,睇廉政公署調查人員去查D政府高官、「有錢佬」、知名人士,點都有吸引力過去查一D「魚毛蝦仔」。所以小編覺得呢兩集特別有「劇味」。


由Kent哥鄭則仕飾演的前政府高官靳東堯係退休保障局的前主席(迷之聲:香港幾時先有呢個保障局的出現)。佢之前係政府「又出又入」。做政府官之後,就去左華誌國際呢個地產商做顧問。做完顧問之後,先至做退休保障局的主席。就睇咁呢個角色,雖然話係影射許仕仁,但小編就覺得佢的感覺有D似前財政司司長「薯片叔叔」曾俊華,可能係因為係記者會劇情入面的親民形象。但係今集臨完個陣對住私人助理林瑞兒(賴慰玲飾)呼喝形成好大的對比。不過,Kent哥的氣場都「Carry」到政府高官的角色。下集應該可以睇佢繩之於法。


另外,陳家樂同陳瀅呢對「緋聞情侶」(當事人話係朋友),喺劇集入面都愈嚟愈合拍,兩個都升哂職,由助理調查主任升左做高級調查主任,亦見到佢地調查個陣更加成熟同有信心。但今次佢地查政府高官遇到好大的阻力,就係佢地的前上司韓奕山(黃智賢飾)因為佢無做高級調查主任之後就做左執業大律師,仲要今次佢的客就係靳東堯!唔知最後單案點呢?


Ref: TVB

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→