【前瞻】《婚姻合伙人》能否憑男女主角「新人」突圍而出?

內容沉重的《鐵探》完左之後,就輪到一套輕鬆小品《婚姻合伙人》「接棒」。點解會話係小品,一黎呢套劇係緊急咁樣頂替「安心事件」主角黃心穎的《堅離地愛堅離地》,可以話原本呢套劇應該要繼續擺係倉底。二黎TVB已經開始宣傳定《婚姻合伙人》之後會播的另一套劇《白色強人》(就係《鐵探》大結局之後有個宣傳片話6月10號開始播《白色強人》)。一套劇播都未正式開始播就已經宣傳定下一套劇,小編印象中唔常見,通常都係套劇播到中後段先開始宣傳下套劇。可想而知,TVB的高層對於呢套劇的信心又幾大啦?


讀者可以參考以上片段。可能有人會話,倉底貨實無好野啦!但小編又覺得唔需要咁悲觀。論卡士,呢套劇同岩岩完的《鐵探》一定無得比,雖然兩套劇都有楊明份,但戲份黎講梗係《婚姻合伙人》多,因為係佢第一次擔正做男主角。呢套劇對楊明黎講相當重要。之前有眼利的網民發現連埋呢套《婚姻合伙人》,楊明會係2019年入面劇集出街率最高的男藝人(仲未計埋綜藝節目),之前《鐵探》的Matt Sir(邱勵傑)有正義感,角色討好,但如果作為郎朝勇(Guts)呢個主角唔理想的話(仲有同時播緊的網劇《機動部隊2019》),觀眾分分鐘會因為見得太多楊明而有「楊明恐懼症」!!!


呢套劇除左楊明首次擔正之外,居然連女主角「高Ling」高海寧都係首次擔正,又真係好驚喜,因為通常劇集好少同時起用兩個「新人」(呢度指未做過主角的)。當然,觀眾睇「高Ling」做劇其實都已經有一段日子,對上一個有口碑的角色,小編無記錯的話應該就係《不懂撒嬌的女人》入面的「俏秘書」田蜜。如果睇角色的造型,「高Ling」今次係《婚姻合伙人》凡飾演的貝競枝(Kimchi)又D似田蜜的角色,都係有D「女強人」的款。黎緊就要睇下佢呢個角色同楊明的Guts有咩火花。


套劇主線之外,仲有陸永(飾演郎朝仁)同埋林秀怡(飾演施嘉露)的副線。暫時係宣傳片入面睇到佢地呢一Pair歡喜冤家可能仲好笑過男女主角,主要係因為佢地「互串」得幾搞笑。對上一套講「樓」的劇集,應該就係之後做左視帝的「Signal Wong」王浩信(拍呢套劇個陣未係視帝)同黎緊會幫手重拍《法證先鋒IV》的李施嬅(前名李詩韻)主演的《樓奴》,呢套劇係當時的口碑都唔錯。正所謂無期待就無失望,仲可能會有驚喜,就睇下《婚姻合伙人》可唔可以突圍而出。


Ref: TVB

標籤: TVB  婚姻合伙人  楊明  高海寧  林秀怡  陸永  

留言


請按此登錄後留言。未成為會員? 立即註冊
    快捷鍵:←
    快捷鍵:→