【點評】《鐵探》結局後感 – 唯一的大贏家係「佢」!?

《鐵探》終於都大結局,最後要死的死,傷的傷,基本上無咩邊個係「贏家」。如果夾硬要搵成套劇集最後的勝利者,個個人一定係Samuel程宇森(黃智賢飾)。一個一直厭惡「權鬥」,最後卻依靠「權鬥」上位的角色!雖然佢係堅持要伸張正義,但從結果黎講佢的最大對手Madam Man萬晞華(惠英紅飾)的確俾佢拉左落馬。其他主要的角色,垶Sir(袁偉豪)可以非殉職的情況下葬係浩園,只可以話係對佢呢個「鐵探」最後的致敬。另一個「鐵探」Bingo(姜皓文飾),全靠佢的死同佢之前搵的料先可以告得入Madam Man!


讀者可以參考以上片段。片段入面的場面其實可以話係垶Sir死前想像的情景。警員編號PC38451的Bingo著住警察制服,向一樣著住警察制服的垶Sir互相敬禮。心水清的觀眾應該記得垶Sir係劇集入面第一次著住制服,因為佢平時都係便裝去查案。至於Bingo,佢呢一幕應該唔係第一次著制服,係Madam Man搵Bingo做臥底的回憶片段入面都有出現過。所以呢個咁形象化呈現的「鐵探形象」可以話係交代番佢地兩個獨特的關係。由一開始Bingo開槍誤傷垶Sir,垶Sir對Bingo的恨意係經歷過咁多風風雨雨之後變成互相諒解同敬意,可以話為劇集畫上一個句號。


劇集入面的兩大反派,警察個邊的Madam Man,同埋黑社會個邊的營長(吳廷燁飾),係監獄入面的對話,亦叫做係「惡有惡報」。萬晞華之前因為要上位的關係,先後害死左阿進(邱勵進)(洪永城飾)同Matt Sir(邱勵傑)(楊明飾),之後當然受到良心的責備(原來Madam Man仲有良心?!)! 營長壞事做盡當然最後係被判終身監禁,但營長亦都話:「估唔到Madam都係!」的而且確,Madam Man的心靈上都係自己判左自己「終身監禁」,因為呢個陰影會跟足佢一世!而佢亦都要接受紀律聆訊,做唔到佢一直好想做的「女一姐」。


成集大結局入面最令小編印象深刻的,一定係大贏家Samuel「飛起」之後去捉營長。明明Samuel呢個角色係傷健人士,一直要靠輪椅代步,今集仲要俾營長開槍射下隻腳(證明Samuel對腳係無知覺)。但佢係個陣就好似潛能爆發咁樣,又或者係阿Ben黃智賢之前係《福爾摩師奶》飾演的「燕子」寡佬關一夫「上身」,真係好似燕子咁係天上面飛,呢下又真係令小編O咀,唔知你又係唔係呢?


Ref: TVB


如果喜歡我們的文章,請即分享到︰

標籤: TVB  鐵探  惠英紅  黃智賢  袁偉豪  姜皓文  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→