【義氣】《愛．回家之開心速遞》- 熊樹仁為阿煇大鬧大小姐!?

個頭馬蹄露發表「去圍垃圾焚化爐」的言論，今日的《愛．回家之開心速遞》又見到司徒獨孤明珠(馬蹄露飾)(唔通佢係想增加曝光率去幫劇集宣傳?!)但佢係劇集的出現都係講番劇情又番番去「大小姐送水煇CP」個度，送水煇(許家傑飾)的捐精計劃終於俾佢深愛的大小姐龍力蓮(林淑敏飾)知道左，佢地呢對戀人亦被迫要同對方坦白。本身知道送水煇諗住捐精去變有錢人的仁哥熊樹仁(單立文飾)今集罕有咁唔理階級觀念，頂撞人見人怕的大小姐，為的就係想大小姐明白送水煇為佢地之間愛情的付出。


讀者可以參考以上片段。大小姐發現佢成日想見到的送水煇一放工就唔見人，打電話去「好爸Bar」又搵唔到佢，所以專登去平時佢地的「安全屋」搵佢，點知送水煇又話要早訓，又收到神秘電話叫佢食專門飯盒，搞到大小姐誤以為送水煇有外遇。所以大小姐就諗住喬裝去「好爸Bar」睇下究竟送水煇的秘密情人係邊個。佢發現送水煇係VIP房個度見個個人，偷偷地望埋去真係令佢即時心碎，因為送水煇私會的秘密情人就係一向好討人厭的司徒獨孤明珠!


聽到佢地兩個個D令人骨痺的對話，大小姐先知道送水煇同司徒獨孤明珠諗住生屬於佢地的下一代，個Step仲快過自己同送水輝。到送水煇佢地轉移戰場的時候，仁哥熊樹仁先發現到大小姐一直係間房入面聽緊送水煇佢地的「驚天大計」。係大小姐諗住去鬧爆司徒獨孤明珠的時候，熊樹仁佢居然喝止大小姐，叫佢Sit。跟住佢就解釋話係唔想大小姐誤會送水煇，因為送水煇佢咁做都係為左大小姐。熊樹仁更加用「自私的老女人」去形容大小姐。


熊樹仁講野句句到Point，佢先話大小姐為送水煇做左D咩，然後更加指出有D野明知係錯的都要去做，就係為左買個機會(劇情指送水煇同司徒獨孤明珠的交易)。小編係睇到呢度的時候就突然諗起點解D人要去圍野，其實道理一樣，所以叫人「去圍垃圾焚化爐」的，可能係未熟個劇本咁解!當大小姐又講到係因為大龍生龍敢威(羅樂林飾)先唔可以同送水煇一齊的時候，熊樹仁再話大小姐: 「你唔好成日擺大龍生上枱先得架!」唔知你又點睇熊樹仁話大小姐呢?


Ref: TVB