【綠葉】《好日子》主線唔係最好睇,配角仲搶戲過主角!?

經過好多集的「齊家村回憶錄」之後,《好日子》劇情的主線開始集中番係現代的齊家村,亦都意味住年青版的齊萬碩(張明偉飾)、齊萬基(容天佑飾)同卞慧晶(吳嘉儀飾)的出場機會愈黎愈少。但主線(三個人點樣面對番當年的事)醞釀緊的同時,副線方面可以話係多線發展,又講到長春藤小學、又講到古董店俾人告、仲有即將會舉行的齊家村村長選舉……。一如既往,通常TVB的倫理劇都唔係主線最好睇,小編反而覺得係副線的配角比較出色,係度借機會講下。


如果成套劇入面最好笑的情線,小編就會話係長春藤小學的情節。可能係既定的固有思維影響,一講到村校,就好自然諗起《五個小孩的校長》。當然長春藤小學的師生數目都比起呂麗紅校長的幼稚園好,但資源上都比較匱乏。更加因為卞慧晶(陳煒飾)同齊萬基(黃智賢飾)的「私人恩怨」,間接影響到學校的乒乓球隊,因為齊萬基就一直係長春藤小學的教練。崔Sir崔志華(林景程飾)往往就係長春藤小學劇情入面最搶戲的老師,你會覺得佢係一個充滿教學熱誠又關心學生的老師,但係學校唔夠資源的情況下,佢又要兼顧好多非教學職務,例如:要幫手煮飯,又要代齊萬基去帶隊參加乒乓球比賽,仲慘到要俾學生「串」,因為佢用足球理論去教班細佬去打乒乓球,仲要佢地擺4-4-2陣式,結果俾學生「串」要唔要用埋「插水式頭鎚」。但崔Sir又真係關心學生GE,係D學生要搵校長傾計之前,都專登交代學生的情況俾校長聽,但卞校長最後都係擺左烏龍,同個學生講佢阿嫲會番黎搵佢,仲可能帶埋佢走添!(其實校長搞錯左個同學阿嫲移左民,佢阿嫲已經「仙遊」左)

除左崔Sir個角色幾搞笑之外,小編覺得做齊萬碩Zack個仔Kyle齊豎佳(朱敏瀚)都唔錯,佢做到個種係外國回流,又幾不食人間煙火的感覺。阿爸係澳洲有生意,佢都算係富二代個種人,番到重男輕女的齊家村,又即刻多左成條村的鄉親父老「Back up」,又貪得意想試下自己做生意,暫時就睇落應該做唔掂啦。小編記得之前朱敏瀚有一排好多戲都有佢份,差唔多每10套有4套都有佢份(當然戲份唔算多)就連前排重播的《法證先鋒》都有佢,唔知點解近呢兩年佢有份做的戲少左咁多呢?


Ref: TVB

如果喜歡我們的文章,請即分享到︰

標籤: TVB  好日子  崔Sir  林景程  Kyle  朱敏瀚  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→