【人生勝利組?】《白色強人》– 德仔「撈」埋談判專家!?犯人道出香港人無奈

尋晚個集的《白色強人》講到有精神病的人拎左支警槍之後就係激動之下開槍射傷左佢上司,而且佢仲挾持左多個人質。中槍的人再唔送到醫院就一定會有生命危險,不過個個精神病人就唔俾救護員送走個傷者,只係肯俾明成北醫院派的醫療隊入去搶救。今次就唔係唐明(馬國明飾)出馬,佢派左佢的好徒弟德仔潘懷德(何廣沛飾),連埋Zoe蘇怡(唐詩詠飾)同Kennis程洛雯(李佳芯飾)組成醫護隊(其實同上次救俾石屎壓住加埋心口俾鋼筋刺穿個病人一樣)。但今次就發現德仔另一項潛能,就係做「談判專家」!


讀者可以參考以上片段。係醫療隊諗住入佢案發現場救人的時候,精神病人一開始唔俾佢地入去,因為話要見到證件先俾佢地入去(委任證?!)搞左一輪之後,本身扮係醫生的談判專家就無入到去,得番明成北派去的人入到案發現場。Zoe同Kennis兩個就即刻去幫傷者檢查同搶救,德仔望一望先發覺拎住枝槍的男人,原來佢前幾日先係籃球場有過一面之緣,所以佢就要嘗試令個個精神病人冷靜。


個個人認得德仔之後,就開始講佢點解會拎到支槍,講講下就變左講自己不如意的人生。平時就俾上司欺壓,又搶去D單,仲要成日俾人話「廢柴」,仲要俾上司「落佢面」。之後佢就開始用自己同德仔比較,話德仔係人生勝利組,後生靚仔的醫生,仲要有靚的女朋友,即係Ceci方書婷(馮盈盈飾)。德仔就開始安撫個個精神病人,但佢之後就講出成個香港的無奈:「03年沙士,話要共度時艱,08年金融海嘯,又話要共度時艱。前後加埋成十年啦!一毫子人工都無加過俾我啦。」又真係要學柴九哥話,「人生有幾多個十年!」相信好多人睇完呢Part多多少少都會有共鳴。


跟住個精神病人又講到好多香港人的無奈,就係「上車」無望!「十年都儲唔到個首期,幾萬蚊買格階磚」(其實二十至三十年都可能儲唔到首期!!!)佢又真係講得好符合香港的情況(小編覺得個演員其實幾好戲)。但係個精神病人咁激動的情況下,德仔呢個「談判專家」又要出動,最後都成功勸到個精神病人俾Zoe同Kennis佢地將個傷者送去明成北醫院,你話德仔呢個「談判專家」係唔係做到野先?


Ref: TVB

如果喜歡我們的文章,請即分享到︰

標籤: TVB  白色強人  德仔  潘懷德  何廣沛  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→