【測謊】《娛樂大家》- 郭子豪「Cheat Chat」被圍攻: 你係唔係真係同「佢」係教友?

係《婚姻合伙人》播完之後,今集的《娛樂大家》先邀請一眾演員上黎做嘉賓,好似慢左少少,已經唔係幫套劇宣傳,加埋今集的主題「騙案」都同套劇無咩關係。今集的主持無左阿公蘇永康(唔知係無一集定之後都無?),但有做開主持的陸永幫手,邊玩邊帶氣氛,所以睇落節奏都幾快,但今集的「Cheat Chat」小編明顯睇錯「重點」。


讀者可以參考以上片段。今集的「Cheat Chat」除左睇人互Trap之外,亦罕有咁見到一班嘉賓玩玩下玩到圍攻藝人的花邊新聞。被圍攻個個就係比較多負面新聞纏身的Arnold郭子豪。15:49個度開始,林師傑突然間心血來潮就問其他人,問下佢地平時回應記者會講真野亦或假野,跟住其他人就開始乘勝追擊咁問郭子豪啦。Bella林穎彤一黎就已經好似放大絕咁問:「郭子豪,你方唔方便回應你係唔係一個誠實的人,你係唔係真係同佢係教友?」係度補充下,Bella問題入面所指個個「佢」,係指上年港姐亞軍兼最上鏡小姐鄧卓殷(Amber),因為之前有傳言話郭子豪同前女友分手關Amber事,而個陣郭子豪澄清佢地只係教友關係。


郭子豪對住Bella的提問,先係尷尬咁笑一笑,之後飲下水,跟住就試下迴避條問題。跟住何雁詩唔避忌繼續「補刀」,再問郭子豪係咪同Amber係教友,仲要係節目「開埋名」! 真係見到郭子豪非常尷尬。陸浩(陸浩明)出名轉數快,即係諗住幫手轉移視線,就話: 「開埋名呀你地,你話港姐亞軍咪算囉。」吳若希(Jinny)呢個時候先反問:「係咩係咩?唔開名咩?」郭子豪應該心諗多得你地唔少!轉數更快的陸永就直頭將個焦點轉移番去遊戲的本身,問番Jinny個個人(Amber)係真定假,最後Trap到Jinny,亦成功幫郭子豪「解圍」。


但何雁詩仲未肯放過郭子豪,問佢:「你幾個月黎講呢,做人算唔算誠實?」陸浩又加吧口話:「如果係誠實就唔怕認啦。」Jinny亦都幫口再問郭子豪覺得自己算唔算老實/誠實。終於郭子豪今次唔駛靠陸永幫佢「解圍」,佢自己試左幾次之後成功「舉報」Jinny,亦估到個牌係「認自己誠實」。玩遊戲玩到咁,真係睇到郭子豪佢非常尷尬。雖然佢最後都無係節目再回應Amber係唔係佢教友,但都未免令人有其他的聯想。唔知你又點睇呢?


Ref: TVB

標籤: TVB  娛樂大家  郭子豪  林穎彤  何雁詩  吳若希  

留言


請按此登錄後留言。未成為會員? 立即註冊
    快捷鍵:←
    快捷鍵:→