【如何做好爸爸】《娛樂大家》- 阿Bob:「一定要好努力晚晚做人!」

今日的《娛樂大家》又係應節特別版(父親節),以「男人味」做主題。但小編覺得今集比起之前的好笑,因為其中一個嘉賓係阿Bob(林盛斌),有阿Bob的高轉數同埋幽默感令到成個節目生色不少,雖然會有人覺得佢的表情同姿態太誇張,佢佢今集同陸浩(陸浩明)係「Cheat Chat」入面都幾有火花。另外幾位嘉賓,陳自瑤Yoyo(好耐無見佢係幕前)、「糖妹」(黃山怡)同埋蕭太黃翠如的表現都唔錯,當中就係「翠如BB」的表現最搶鏡。


讀者可以參考以上片段。平時問答環節都相對比較悶,但今集阿Bob做左第一個未聽哂問題就答的嘉賓,以為係問香港父親節係6月的幾時,點知原來係問台灣,叫做一開始就打響頭炮。到左「Cheat Chat」環節,阿Bob戴左個假髮變左Bobo(真係唔係個個頂得順)。一開始「翠如BB」以為自己頭上個牌係佢老公蕭正楠,但其實係拍節目前佢地去度蜜月的峇里,所以就錯誤「舉報」。連中兩次招之後,阿Bob就開始發揮佢係「Cheat Chat」方面的超強戰鬥力。係糖妹問佢想D女送咩俾佢的時候,佢調番轉問糖妹會做D咩同阿爸慶祝,搞到糖妹「中伏」。


跟住阿Bob就諗住Trap陳自瑤,追問佢會送咩禮物俾爸爸。Yoyo本身都話未諗到,仲話父親節未到(因為係父親節前錄影),係亂亂地的情況下再俾阿Bob同其他人追問,最後係Arnold郭子豪中招。之後阿Bob繼續發功,吳若希(Jinny)問佢覺唔覺自己係一個好爸爸,點知阿Bob好似D高官咁答:「我自己呢…我唔會將自己的立場咁容易講出黎GE」,咁又避開左。到林師傑請教點樣做一個好爸爸,阿Bob先再中招:「一定要好努力晚晚做人就可以做到好爸爸!」


但成個環節最Show到阿Bob功力的係佢令到同樣轉數快的陸浩以為自己成功Trap到阿Bob。係阿Bob問緊「翠如BB」點先係一個Man的男人的時候,陸浩就話自己聽唔到(阿Bob問咩),專登Trap佢想阿Bob大聲咁講多次。到阿Bob再問多次都係話聽唔到,終於搞到阿Bob以「咆哮式」再問多次條問題,陸浩仲以為自己成功Trap到阿Bob,但原來阿Bob頭上個牌係「大聲答問題」,而唔係「大聲問問題」,搞到「Cheat Chat」老手陸浩都要出番次醜。阿Bob今次「Cheat Chat」可以話係「以一敵八」,唔知你又覺唔覺呢?


Ref: TVB

如果喜歡我們的文章,請即分享到︰

標籤: TVB  娛樂大家  Bob  林盛斌  陳自瑤  糖妹  黃翠如  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→