【四世情】《愛.回家之開心速遞》- 群姐同歐陽波比勁過《三生三世》!?

尋晚的《愛.回家之開心速遞》繼續係歐陽波比同Isabella群姐(許思敏飾)的特別版,呢兩集的出場人物都可以話有誠意,熊家上上下下同接龍集團的各成員都有係三世書的情節登場,就連譚道德一家都有派代表,就係譚道德(陳榮峻飾) 同Bonnie譚育英(林凱恩飾),真係可以話「群星拱群姐」。第一世的《金裝四大才子》完左之後,就係第二世的《梁山伯與祝英台》同埋第三世的《色,戒》,大玩Crossover,群姐又真係可以同歐陽波比多次邂逅,完全滿足哂Isabella群的願望!


係《梁山伯與祝英台》的世代,歐陽波比唔係大名鼎鼎的祝枝山,佢係求學的梁山伯。女扮男裝去學堂的祝英台當然係呢兩集的主角群姐。跟番民間流傳的版本,梁山伯識左祝英台之後就覺得自己好似「觸電」咁。現代的龔燁(張景淳飾)曾經有幸「欣賞」群姐「白滑GE胴體,同埋曼妙GE身軀」,係古代呢個機會當然留俾客串的歐陽震華 (Bobby)。係以為梁山伯訓左之後,祝英台就諗住沐浴更衣,點知梁山伯原來訓完又醒左,所以佢就可以「非禮勿視」。群姐又一次為左《愛.回家之開心速遞》犧牲色相。


到左抗日戰爭的時期,歐陽波比呢世就化身好似梁朝偉咁有型的易先生,係情報機關的主管。Isabella群就係好似湯唯咁靚的女學生(自己腦補),佢就係要係暗殺行動入面刺殺易先生,當然要色誘佢先啦。係國難當前,群姐真係犧牲一切,好快佢就征服左易先生呢個歐陽波比。但係抗日戰爭臨完的時候,群姐就因為決意要執行刺殺任務,所以就聽唔到日本蘿蔔頭戰敗投降的消息,親手將自己最愛的易先生射死左!


番到現代,群姐因為知道自己害足歐陽波比三世而好內疚,所以就聽「神棍」亂講,諗住用佢畢生的積蓄去幫歐陽波比去種生機。Terry(李偉健飾)同大小姐龍力蓮(林淑敏飾)講番成件事,大小姐一聽都已經知係騙局,於是就重金禮聘歐陽震華(Bobby)去勸下群姐。點知誤打誤撞之下,群姐連今世都要害自己的偶像歐陽波比,一野推左佢落山。之前就因為網民的集氣,先可以成功將歐陽波比真係可以係《愛.回家之開心速遞》現身。又有網民話要力推群姐好似大小姐咁拎到女配角獎,唔知呢一次又可唔可以再次集氣成功呢?


Ref: TVB

標籤: TVB  愛回家  開心速遞  歐陽波比  群姐  許思敏  

留言


請按此登錄後留言。未成為會員? 立即註冊
    快捷鍵:←
    快捷鍵:→