【世界盃雜談】當無線完全放棄體育節目 精選 推薦

世界盃曲終人散，決賽收視亦已公布，法國對克羅地亞呢場波，冇乜懸念地再創viuTV收視新高（平均24.4，最高26.6）。

＜蘋果日報圖片＞

對於體育，無線幾乎已經採取放棄策略，電視新聞既體育環節愈縮愈短，最近又解散埋體育部，連唯一既體育節目《體育世界》都壽終正寢。

大台看待體育運動既態度，同我地既前特首一樣，一句講哂，就係覺得「冇經濟貢獻」。

要佢地將來再揼舊錢，去購入世界盃既直播權，機會真係微乎其微，除非…中國踢入世界盃喇。

早已北望神州既CCTVB，到時又點可以放棄呢個唱好強國既機會？話唔定到時仲會同央視聯播，全程緊貼中國國家隊既比賽情況。
＜互聯網圖片＞

不過，呢啲真係香港球迷想睇到咩？當然無線唔會理你，因為佢服務既都已經唔係香港人。

面對呢項四年一度既盛事，今屆冇得播世界盃既無線，除左決賽當晚擺套《使徒行者》電影版，同連播兩集《刑偵IV》外，其餘時間採取既策略，就係乜都唔做，靜悄悄咁等呢個月走過，再由報幕員「精挑細選」公佈收視結果，營造一片歌舞昇平、大台無懼世界盃既氣象。
＜劇照＞

對於只會睇無線，死都唔會轉台既觀眾，今屆世界盃對佢地黎講，就好似存在喺另一個平行時空咁。

所以，當見到大台得返2點收視，難免會覺得應有此報。
當然，你可以話，世界盃之後，一切又會打回原形。的而且確，viuTV真係要諗諗點樣留住班觀眾，等無線唔好以為踢完世界盃，就真係完全解除威脅，但觀眾至少用收視摑左無線一巴。

世界盃收視理想，冷手執樂視個熱煎堆既viuTV當然開心，只係用約四分一價錢，就投得今屆香港區獨家直播權。

＜FB：鍾仔 鍾志光＞

比起2014年巴西世界盃，今屆開波時間無疑更有叫座力，而viuTV可能為左省招牌，揀選既場次亦來得比2014年既無線「大方」，19場免費波不乏大戰戲碼。

不過，今屆過後，四年後既卡塔爾世界盃又點呢？冇左樂視為他人作嫁衣裳，無線又覺得「冇經濟貢獻」，nowTV仲會唔會捨得花幾億港元，去投個明知蝕梗既直播權返黎呢？

四年後既野真係冇人知，正如四年前都唔會有人覺得，世界盃可以將大台打個落花流水。

不過，每屆世界盃結束時，球迷們最想既，應該就好似李克勤喺02年世界盃尾聲話齋：「希望四年之後既世界盃，我地可以唔使畀錢睇！」

講就咁講，但大家深知肚明，喺香港呢個咁畸形既電視生態，其實只會愈黎愈難。