【世界盃雜談】從「梗頸四」講起,兩年可以改變好多野

講樂‧過路人 於 15/07/2018 發表 收藏文章
「Guys,有啲野你今日有,唔等於聽日有,我講緊既係...」

如果你有扭開電視機睇世界盃,應該成日喺廣告時段,聽到王敏德講呢句野。


除左頭髪之外,今日有唔等於聽日都有既野,仲有踢世界盃既機會。

今屆有啲運仔既英格蘭,季軍戰輸畀比利時,只能屈居殿軍,但以一隊淨係識靠死球入波既球隊黎講,其實都好合情合理。

<互聯網圖片>

對於呢隊英格蘭既踢法,同埋個別球員既技術,小弟就唔打算評論喇,畢竟呢度唔係「波事春秋」,又或者「球迷世界」。

反而想分享下既,係評述員何輝講過既一番說話。
季軍戰何輝冇份講波,如果佢有份既話,小弟相信佢會將以下呢番說話再講多次,事關之前佢已經講過至少兩次。

<蘋果日報圖片>

「兩年前,如果你同陣中既英格蘭球員講,你兩年後有機會去踢世界盃,應該連球員自己都會覺得,你係咪講笑呀。」

的而且確,今屆既幼獅兵團,本來只係打算為之後既大賽準備,點知碌下碌下入左四強。

好似撲出個名堂既門將碧福特,兩年前啱啱先喺英超站穩正選,更加未以門將天價加盟愛華頓;

<互聯網圖片>

經常殺上去頂波,八強對瑞典開紀錄既麥佳亞,兩年前都仲係同緊班朋友捧英格蘭;

<互聯網圖片>

以為乾塘冇曬貨既艾殊利楊格,自從摩連奴執掌曼聯後忽然回春,更加重新入選國家隊;

<互聯網圖片>

短短兩年之間,原來可以有咁大轉變。

由當初冇人覺得你會踢到世界盃,到呢刻真係落場代表英格蘭,仲踢埋入世界盃四強,畀人感覺到希望既,唔單止有呢隊英格蘭,仲有背後既呢份際遇。

然後,當你望返自己,可能會發現,兩年前既你同依家既你,點解好似冇咩分別咁。

即使係咁,都唔使太灰心既。事關你有努力付出過既話,世界上無任何一件事係完全冇意義。

兩年後當你再回望今日,話唔定會發現自己,就好似呢班英格蘭球員咁,喺不知不覺間,有左翻天覆地既轉變。

<互聯網圖片>

不過,掉返轉頭,好似王敏德話齋,有啲野你今日有,又唔等於聽日都有。

對於今屆冒起既英格蘭球員黎講,上得快,隨時跌得仲快。假如因為入到四強而自我感覺良好的話,兩年後既歐國盃,或者下屆既世界盃,代表英格蘭既機會,隨時又會畀其他球員頂上。

變幻原是永恆,呢種風水輪流轉,可能就係人生弔詭,同時又有趣既地方。

如果喜歡我們的文章,請即分享到︰

標籤: 世界盃  英格蘭  世界盃雜談  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→