【原來你也住在大埔2】跌落林村河,都唔一定係為咗捉精靈

講樂‧過路人 於 02/08/2016 發表 收藏文章
家欣同男朋友泰臣,嚟到八號花園嘅板長壽司,等緊嘢食送嚟嘅時候,各自攞起手機玩。

家欣偶然會望下坐喺對面嘅泰臣,見佢全副精神,都放晒係手機螢幕上面嘅《Pokémon Go》,表情肉緊程度,更係前所未有咁強烈。

泰臣不時仲會抬起頭,好開心咁同自己講:「呢隻都畀我捉到呀!」然後一秒即閃,將眼神放番落部手機之上。

望住眼前嘅泰臣,本身冇玩《Pokémon Go》嘅家欣,都唔想掃男友興,只係繼續碌自己部手機,睇下facebook嘅newsfeed,碌下碌下,見到呢段新聞:「訓練員捉精靈墮林村河」

<蘋果日報圖片>


【延伸閱讀】訓練員捉精靈墮林村河 Kitty︰好想知佢捉咩


家欣好想即刻同泰臣開心share,但佢知道,對處喺投入mode狀態嘅泰臣講,只係會換嚟敷衍嘅語氣。呢刻同佢講,只會令自己無癮。

家欣望住手機螢幕,望住段新聞嘅文字,又望下跌落林村河嗰位巴打張相,來來回回望咗好幾次,心裡面同讀者Kitty一樣有個疑問。

不過同Kitty唔同,家欣並非想知道,個後生仔因為捉咩而跌落河,反而諗起,自己到底有乜嘢,就算要跳落河(或者跌埋落河)執起,都會認為係值得嘅呢?

<Topick圖片>


關於呢個問題,家欣其實都好耐冇問過自己。

冇錯,係巴哈嘅手稿,係古典音樂家巴哈嘅作曲手稿,呢個答案閃過家欣嘅腦海。

家欣係個鋼琴老師,而自己當年學琴嗰陣,第一首彈嘅就係巴哈嘅歌。可能因為呢種「第一次」嘅情感,對於巴哈,家欣有份特別嘅感覺。

<互聯網圖片>


「如果林村河漂浮住巴哈嘅手稿,或者我會跳落河都未定...」正當家欣幻想緊嘅時候,腦海又浮現另一個畫面。

家欣忽然諗番起,個間喺大埔海濱公園回歸塔隔離,叫做「P-105 Cafe」嘅地方。

幾年前某晚食完飯,家欣喺海濱散步嗰陣,經過呢個位置,感覺好似從未見過間Cafe,就停低窺探下呢間店鋪。

Cafe門面幾有格調,店內悠和既燈光透出店外,門外仲掛住「唔飲野都歡迎入黎」,令家欣都不自覺推開大門。

「P-105 Cafe」同其他cafe最大既唔同,係成個氛圍都有種懷舊嘅音樂氣息,周圍擺滿好多珍藏CD、黑膠碟、甚至casette帶...而好多作曲人同填詞人嘅手稿,同樣好似珍品咁,擺放得整整齊齊。

Cafe中央有個小型表演舞台,旁邊有個調製咖啡嘅工作間,角落處仲有個擺滿CD嘅counter,櫃面企咗個帶住幾分沉鬱嘅中年男人。

佢,就係「P-105 Cafe」嘅店主。

<為左令大家更形象化,呢個係我想像既店主>

純粹諗住入黎參觀下嘅家欣,原本都想叫杯Cappucino避免尷尬,但見到其他喺Cafe裡面嘅人,其實唔係個個有幫襯,家欣都無刻意叫嘢飲,只係繼續陶醉係呢個音樂同Cafe嘅世界。

Cafe裡面不停loop住歌,而且幾乎都係廣東歌,唯獨呢首例外。

一首英文歌,家欣唔太知邊個女歌手唱,但旋律就相當熟悉,因為係巴哈送畀第二任老婆嘅《Minuet in G major》。


喺一間陌生既Cafe裡面,聽到熟悉嘅旋律,令家欣慢慢將腳步,移向擺滿CD嘅counter位置。

「請問,呢首歌係邊個唱?」家欣望住counter嘅中年男人,希望知道答案。

中年男人聽到家欣嘅問題,並冇直接回答,只係微笑住咁問佢:「唔通你鍾意彈巴哈?」

家欣嘴角微微向上翹,臉龐有少少泛紅咁點頭。

然後中年男人從背後嘅CD櫃,一邊攞出一隻碟,一邊同家欣講:「咁你應該知道邊個係安娜瑪德蓮娜喇!」

<互聯網圖片>


安娜瑪德蓮娜就係巴哈既第二任老婆。

中年男人將《安娜瑪德蓮娜》VCD放係檯面,然後指指上面嘅陳慧琳。「如果你鍾意彈巴哈嘅,咁你就係呢套戲嘅陳慧琳喇。」

<互聯網圖片>


家欣唔知道佢講咩,亦唔知道《安娜瑪德蓮娜》有部戲,直到望見VCD背後嘅劇情簡介-「樓上搬來了一個喜歡彈巴哈協奏曲的女生莫敏兒...」

莫敏兒...家欣又再流露剛才嗰個,嘴角微微向上翹嘅笑容。

中年男人全部都看在眼內。「咁啦,隻碟借畀你番去睇,下次再黎先還啦!」

然後中年男人向家欣遞上卡片:「我係呢間Cafe嘅店主Jimmy,得閒多啲嚟呀!」

Jimmy同家欣傾咗陣,就行開同其他客人傾計。

拎住《安娜瑪德蓮娜》嘅VCD,家欣覺得呢個店主好有趣。雖然唔係咩值錢嘢,但只係問過自己係咪鍾意彈巴哈,佢就將呢隻碟借畀自己。

冇單據,冇期限…

後來,家欣知道,原來Jimmy係個鍾情廣東歌嘅店主,而呢個亦係「P-105 Cafe」存在嘅原因。

至於「P-105 Cafe」點解開喺大埔海濱,又點解會叫「P-105」,家欣未嚟得切了解,呢間Cafe已經消失於海濱。


***


「三文魚壽司、海膽壽司、帶子刺身...」如果唔係嘢食到,家欣幾乎連男朋友坐喺對面都唔記得。

「係喎!點解我會諗起呢間Cafe?」家欣望望手機,醒起嗰單「為捉精靈而跌落林村河」嘅新聞。

冇錯,因為巴哈嘅手稿。不過就算真係有巴哈既手稿係林村河,應該一早都濕晒睇唔到啦!

<互聯網圖片>


諗到呢度,家欣又忍唔住,嘴角微微向上翹咁冷笑一下。

坐喺對面嘅泰臣,見到家欣呢個笑容,覺得相當好奇。「有咩好笑呀?」

說時泰臣亦將手機放低。就算心裡面幾想捉精靈都好,泰臣知道如果食緊野都仲玩手機,肯定會畀家欣「黑面」黑足全餐,所以都乖乖「棄械」。
家欣將手機遞畀泰臣,叫佢睇下段「為捉精靈跌落林村河」嘅新聞。

泰臣邊睇邊笑,就連嘴邊嘅三文魚都幾乎噴出嚟。「呢單好笑,捉精靈捉到跌落河,你話有超夢夢我都唔會落河捉啦!」

<互聯網圖片>


呢個時候,家欣又再諗起嗰間「P-105 Cafe」。喺大家都玩緊《Pokémon Go》嗰陣,如果回歸塔附近有咩特別精靈嘅話,相信又會有班人蜂擁而至,去到回歸塔隔離嘅呢間Cafe...

忽然之間,家欣有啲慶幸呢間Cafe已經喺海濱公園消失,慶幸自己同「P-105 Cafe」,有過一段雖然短暫,但只屬於佢哋既私人時光。

店主Jimmy,你幾好嘛?你應該冇玩《Pokémon Go》啩...


P.S. 「P-105 Cafe」純屬虛構,回歸塔旁並無此Cafe


筆者的Facebook專頁「講樂.過路人」,也有更多廣東歌跟大家分享,希望多多支持!

https://www.facebook.com/shingster1412/

如果喜歡我們的文章,請即分享到︰

標籤: Pokemon Go  大埔  林村河  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→