Sennheiser Ambeo Soundbar Plus 看電視都可享受影院音效

喺戲院睇戲除咗貪佢畫面夠大，優質嘅音響亦都喺吸引觀眾入戲院嘅原因。至於返到屋企睇串流睇碟都想有如戲院般嘅音響效果？Soundbar固然少不得。正所謂一分錢一分貨，有啲牌子嘅Soundbar真係過萬元嘅都有，但一試聽過後，都會令你有立即購買嘅衝動，我講緊嘅係Sennheiser出品嘅全球首個7.1.4.聲道單件式Soundbar —Sennheiser Ambeo Soundbar Plus。早陣子經朋友邀請，出席這產品的發佈會。睇佢嘅內容介紹都幾巴閉，呢款Soundbar內置 4”雙低音炮，有著沉浸式環繞聲，低音可來得特別震撼。又可以根據室內各種環境進行調整，並自動預設選項，咁就可以適應你所睇嘅內容為何。而且佢係用AMBEO|OS平台，可以支援多種音樂串流服務，咁就唔使另外添置附加元件，沉浸式聲音一樣完美發揮出來。Sennheiser Ambeo Soundbar Plus內置Dolby ATMOS、DTS:X、360 Reality Audio和MPEG-H audio等技術，以Upmix立體聲和5.1環繞音效，玩出3D立體音色，返屋企睇電視都做到好似喺戲院咁。
Text：優記

親身體驗 難以忘懷
睇新聞稿內容梗係話Sennheiser Ambeo Soundbar Plus超正啦！事實係咪咁，於是發佈會即場以一部75吋電視，配以Sennheiser Ambeo Soundbar Plus俾現場朋友睇碟亦睇串流。首先睇《變形金剛》隻碟，最後嗰場城市混戰，啲冧樓、碎玻璃、槍炮聲嚟得有層次而非嘈雜；跟住又睇睇《末日先鋒：戰甲飛車》隻碟，真係好黐線！連開場隻蜥蝪由近至遠嘅爬行聲，都炮製得好細緻！之後睇埋串流平台嘅《鬼滅之刃》，斬鬼頭嗰啲入肉聲，仲有其他刀光劍影、鼓聲等，真係聽到令人熱血沸騰！喺發布會上話，如果你喺屋企睇電視嘅距離，係可以容許放置55吋或以上嘅電視機，咁喺呢個空間範圍，配以Sennheiser Ambeo Soundbar Plus，音效至佳！
以音響治療心靈
特別一提，「Sennheiser Ambeo Soundbar Plus x Jocelyn Chan：《平靜之音》」音頻治療限定體驗館，會開放至今日(6月11日)止，舉行地點為上環西街54號地下的MAJOR POP。開放時間由早上十一時至晚上八時，免費入場。在這段開放時間內，每日整點會開始長達20分鐘，由集唱作歌手、演員、音頻治療師於一身的陳明憙(Jocelyn Chan)設計獨家音頻治療《平靜之音》導賞聆聽體驗，無需預約，可自由參加(人數：5人為上限)，讓大家進一步認識音頻治療，非同凡響的聲音體驗，加上場內不同區域的大自然環境佈置，令你如置身大自然包圍，可以放鬆心情，釋放壓力。除了這活動外，場內亦設有電影片段聲畫播放及不同視聽享受體驗，參觀人士可以到場體驗 AMBEO Soundbar Plus 觀看電影的音效及聆聽音樂，全方位領略AMBEO Soundbar Plus及Sennheiser AMBEO Sub的優點。
Sennheiser Ambeo Soundbar Plus
售價：12,999港元

Sennheiser Ambeo Sub
售價：5,999港元

產品可於AV Life、Super King、AV Consultant (Int'l) Ltd、DMA的旗下指定店舖試聽及購買