「阿叻流」辯論術入門十式:只要有心,人人可成陳百祥

陳百祥杜汶澤的世紀之戰,誰勝誰負大家各自心中有數,但比起是非黑白,更應留存後世的是阿叻的神級辯論術,通曉熟練,何止行走江湖,由古希臘到劍橋都足以殺遍天下無敵手。大家即刻跟叻哥學兩手:
1,「未聽過」人地講嘅論據自己未聽過,首先否認佢存在,然後話「我唔信」。港大民調七成人對警察不信任,只要阿叻唔信,教授什麼的就不入流。反正阿叻一世人未行過入大學,大學就不存在。

2,「我唔知」,「我睇唔到」,兩招連消帶打,只要加埋「我睇三個台」,連是阿叻式的辯論術的基本功。

3,公公說公公有理:自己冇比人封殺,封殺就應該唔存在,再問你有冇見過「封殺張紙」?有呀?咁……大家有大家講啦。含混過關,明未?


4,尤事推去「美國會點做」,當杜生追問美國,提出更多facts,講美國有槍權時就扯去智利,總之,只要古往今來地球尚存一個國家有血腥鎮壓就可以justisfy香港警察,地球精華遊,遊得出色,食得招積。

5,當駁唔到時,就轉移去「大聲唔代表啱」化解。首先用轉移話題、無賴話術激怒對手,稍有反應就立刻擺一副細聲冷靜樣攞彩,幾時由辯論變成鬥細聲比賽?阿叻話幾時係就係,做慣主持,當然要主持大局。

6,自行失憶:自己提完「我地五百萬人」,然後否認自己講過,自行delete失誤,確立不敗之地。

7,腦補都唔係,重新創作現實:開槍警生命垂危,721時「白衣人邊度有攻擊性武器,林議員有攻擊性武器」,facts完全不符?加埋「我睇電視,我睇直播,我睇三個台」基本上足夠拆解。


8,比AE86更世界級的飄移技巧,最緊要是面不紅耳不赤:講到委任證就將標準放到無限低,記者證要求就無限高(掛咗證就係記者咩),拗拗吓個point完全駁唔到?咁我地唔好拗啦……

9,「我唔識聽佢種講法喎。」然後不必回答,直屈對手表達能力,內容全數耳邊風撥千斤到萬丈遠,這招基本上萬試萬靈,刀槍不入,防守的終極境界。

10,唔關我事架,不過你要聽我講嘢。唔關「我」事,咁「我」何解要發表偉論?現兜兜自打嘴巴唔緊要,只要相信。你要反駁我?唔關我事架


最後再quote一次林振強的金石名言:

引用有些人,例如愛因斯坦,可以憑一己之力,改變世界,非常厲害。阿叻改變不了世界,但他可以獨力改變一個電視節目的質素。

任何電視節目,只要見阿叻有份出現,你就知道,這個節目必會變為業餘、不認真,和像馬戲團。以一人之力,左右一個騷,或一件盛事,這正是我渴望擁有的影響力。

如果喜歡我們的文章,請即分享到︰

標籤: 陳百祥  杜汶澤  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→