【炒地鐵,睇漫畫:《末日》來到使唔使返工?】

今朝聽聞中環史詩式炒地鐵的車廂已成功搬離,最可喜可賀是港鐵股價依然穩陣過佢訊號系統。當「炒地鐵」成為善忘香港人這幾天流行詞,我就重讀一次one of最出名的「炒火車」漫畫:望月峰太郎的《末日》。

炒火車/地鐵就好似古典文學既月色水影、大海孤舟咁,係一個時代的集體意象:由日日通勤的悶蛋工具,變成有如巨型墓碑,象徵「非日常」發生。「交通工具末日」系列,由《紅van》開始,「交通工具/本土地標」+「死亡廝殺/無人城市求生」的標準公式,就是小至講故台大至大銀幕的票房保證。



咁《末日》呢套有咩咁巴閉?故事講述高中旅行齊齊坐新幹線,突然炒車困於黑暗隧道中,畫面就有如之前港鐵發出的公關相,烏燈黑火頹敗扭曲,唔講以為《紅van》終於開續集。而熟悉呢類故事套路嘅大家都估到,跟住落去都係被困隧道中的人性廝殺,求生云云。

情節上,今日睇返好似冇咩新意,但最令呢套漫畫脫穎而出擠身經典之列,在於故事中有個同學,在黑暗、悶熱、絕望之間「覺醒」,塗滿斑點以「邪神」自居,漸漸出現朝拜「邪神」的異教,搶糧搶女人不在話下,倖存者的心理壓力同無望窒息感描繪稱得上大師級。

出到隧道之後發覺,隧道內係地獄,隧道外更加係末日級地獄:一個不知名的大災難已經將文明毀滅,就連一直勉強保持人性的主角都崩潰。不像很多同類作品又解謎又解救世人,災難來到就是無妄之災,絕大部份的災民永遠唔會知自己死於什麼原由,救世人之前救到自己其實已經萬幸。


以炒火車炒地鐵開始的故事,如《末日》或者《不死劫》,總是有關人性同追尋災難的意義。還幸香港是個「末日都要返工」的社畜城市,崇拜的邪神叫「供樓」。但當列車崩毀在眼前,窺見到末日景象聯想到的又是什麼?

「我話ok就ok」的馬時亨,永遠唔使上身連股價都唔跌的港鐵,禮頓造假都要保的政府,香港也是一種慢性末日。

標籤: 末日  地鐵  望月峰太郎  

留言


請按此登錄後留言。未成為會員? 立即註冊
    快捷鍵:←
    快捷鍵:→