凱旋門土豪式 13 億豪宅,浮誇騎尼裝修惹網民熱論

香港寸土尺金人所共知,平時大家都居於數百呎蝸居,對「有錢人生活」或者不易想像。日前網上傳出一套「凱旋門特色戶」單位裝潢照,金碧輝煌之餘,更惡俗到搞笑,大家都大呼貧窮限制了想像。

據悉近日有人以13億放售由離岸分公名義持有的凱旋門「一籃子物業」,當中包括圖輯中的80樓4263平方呎天際獨立屋特色單位,更另設1278呎空中花園,呎價近16萬港元,號稱亞洲新高,物理上與經濟上都堪稱離地。至於戶主身份,有報道則指為中聯石化前主席許智明。

但由於單位設計浮誇神奇,引起包括麻利亞等不同KOL爭相share,麻利caption更指樓梯設計有如「細個去飲跳五級嗰啲」,更喚起不少網民舊式酒樓的回憶:「龍鳳大酒樓條梯」「陳生請聽一號線」「三聖啲酒樓」「貼返幾張晚飯小菜紙上去先啦」「睇裝修就知屋主係咩人」。
(海景宴會廳,供十四位用,奉送小菜及青島啤酒半打)

而各帖文間更不乏抵死comment:有人形容面向維港全景的睡房有如「泰皇駕崩feel」「真龍床盤」,整體設計有如「大陸村公所概念」。
設有多張沙發茶兀的客廳(?)更有如「骨場」、「足浴場所」,牆上更裝有三座半個真人高的「福祿壽」陶瓷像,「擺壽宴都嫌佢娘」、「開壺普洱唔該」「係咪攤喺度食福壽膏」等抵死留言不絕於耳。

更令人訝異的是「廁所有尿兜」,方便屋主小便後無需沖廁,這種室內設計可說是世所罕見。至於天台設計難得正常,網民都大呼「好彩冇裝修」。

如果想懷緬昔日香港酒樓情懷,大家可自備點心車,自行前往西九龍凱旋門安排睇樓。
(睡房自設自助早餐及沙律吧)

(情調燈光之下按腳嘆果盤,相信蔡sir都會流連忘返)

(工作房透過大量尺寸不合家具襯托出平民蝸居擠迫感,電競椅亂入再添喜感)

(融入廣洲三星酒店大堂概念,讓經常往來中国的戶主感受賓至如歸)

留言


請按此登錄後留言。未成為會員? 立即註冊
    快捷鍵:←
    快捷鍵:→