《幕後玩家》(Two steps for Heaven)係男人狂想曲:「堅離地」(超現實)嘅多個 “狂想位”---好難中嘅「六合彩」頭二獎卻永遠令人有希望!

光影言志辨 於 03/11/2016 發表 收藏文章
其實,喺現實社會制約中嘅男人,會有咩嘢狂想曲?尤其男人喺無奈返工時,常常會有嘅幻想,原來都盡在「堅離地『關公』」嘅《幕後玩家》之中。
究竟,點樣「兩步」到天堂?究竟,男人喺返工時嘅幻想同狂想,又係D咩嘢呢?原來……
孫慧雪次次出場都露"事業線",有咁樣嘅同事,係男人都會晨早返工!
第一,幻想性?喺《幕後玩家》中,男人返工時,日日都可以見到好似孫慧雪露事業線嘅靚女,邊個男人唔想早D起身返工呢?更何況仲有劉佩玥、姚嘉妮、糖妹(黃山怡)等等燕瘦環肥------點樣類型嘅「靚女」都會有?仲有李豪呢個「乸乸」地嘅角色人物,連「Hehe」都包攬哂!試幻想一下咁樣返工真係好醒神!更何況佢哋全組人一團和氣仲聽教聽話;原來,男人對幻想比起現實可能更覺得過癮?
仲有好似陳華鑫(上)同阮兒(下)等等咁嘅女同事,係男人幻想中的工作同事...
第二,左擁右抱?喺《幕後玩家》嘅角色設定中,首推男人最想做到嘅係佢「大佬」------黃宗澤!左有純情人妻龔嘉欣 ,一心一意幫助丈夫排難解糾紛 (黃宗澤有劇中有孖生姐姐莊思敏嘅「港女上身」);右有公司同事妖冶美艷劉佩玥,做黃宗澤嘅二奶卻無悔無怨無尤!黃宗澤一角係男人至高無上嘅幻想,他簡直係男人心中嘅「大丈夫」!
其實TVB編劇真係好嘢,假作真時真亦假,戲劇中黃宗澤同龔嘉欣係老公老婆,現實中佢哋兩個先至可能係真正嘅"幕後玩家"!(現實中,劉佩玥已心有所屬---伍允龍---佢好打得,黃宗澤你都係咩亂嚟啦!)
但試問,同好似劉佩玥嘅人搞辦公室地下情,係好多男人嘅幻想?
第三,喜愛夜蒲?張繼聰現實中有靚老婆謝安琪,所以喺《幕後玩家》一劇中要他成日溝唔到女------黃宗澤係佢嘅相反一面?喺劇中,張繼聰被安排愛上妖冶美艷劉佩玥,雖然神女無心,但就成日同佢一班姊妹淘夜蒲------仲唔恨死幻想中的男同事!
更何況,編劇玩嘢要安排「炒散王」(打兼職)鄧佩儀(上)呢個短髮靚女角色「咦~乜咁啱嘅」喺張繼聰身邊團團咁轉------試問男人一句:「唔理好醜,只要就手」點解?幻想一下吧!
第四,娶個有錢女?喺劇中,蕭正楠飾演馮汐然呢個角色,可能真係男人心中最大嘅幻想---娶個有錢女已經好「堅離地」,仲要樣靚身才正兼純品善良---黃翠如飾演嘅顧成雙?果真係「仙履奇緣」!
更何況,顧成雙嘅老豆顧復生仲送埋豪宅、名車,兼成間公關公司Rainmakers俾馮汐然做主人---呢個仲唔係做男人最大嘅幻想!仲未計「港女」最嚴格要求嘅求婚,居然由做女方嘅顧成雙主動完成!
「生怕多情害美人」嘅馮汐然現實版本蕭正楠同黃翠如,根本就係一對,翠如BB亦真係有個有錢上市主席老豆!坦白喺「戲裏戲外」都如是嘅話,做男人做到如此又乎復何求---蕭正楠係唔係咁話呢?
最後係,「嘴嘴」、「攬攬」呢一D嘢就肯定係男人返正時嘅最大幻想之一!至於粗口,又試問一句,有幾多男人不會講帶有「諧音」嘅粗口?劇中人物無粗話,可能先至係最「堅離地」(超現實)!
男人幻想破滅,回歸現實嘅……後記一二:
第一,將《幕後玩家》放在八時半至九時半,傳統上係「合家歡」嘅時段;但其實,好多男人打工仔,單身嘅好多時可能先啱啱收工食緊飯,喺茶餐廳 “ON車車”一條友或幾條友食自己之際,睇見《幕後玩家》三位男角,幻想佢哋「堅離地」(超現實) 嘅幻想,咁樣嘅心理投射性幻想,就好似六合彩一樣,好難中頭獎卻永遠有希望……
至於,放咗工仲有家室嘅男人,要夜蒲已不能、「嘴嘴」、「攬攬」嘅左擁右抱就更加「作死」(想頭家散?),飲酒食煙都算,但難道講句粗口都唔准許------電視尺度所限?
(左起)張繼聰、黃宗澤和蕭正楠飾演的PR角色,被指係「堅離地公關」。如果007無女無車無靚人靚景,你會唔會俾錢入場睇?
註:本文送給管理員編輯,多謝他們睇實,幫手執去甩漏!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→