內政保鑣 精采英劇 瑕不掩瑜

美劇咁樣睇 於 18/10/2018 發表 收藏文章
【煲劇介紹番】
劇名:《Bodyguard》(內政保鑣)
集數:共6集
頻道:BBC/ Netflix
產地:英國
IMDB評分:8.4/10

一個劇可以頭15分鐘就令到小編下定決心一次過煲晒佢,你就知佢幾咁勁!英國劇《Bodyguard》10月24日喺 Netflix正式有得睇,之前喺 BBC One播出時,已經超好評,佢唔係每集一單Case嘅模式,而係整個陰謀六集去演繹。

如果有睇開英劇,應該都聽過《Life of Duty》呢套超爆收視查案劇,香港譯做《反腐先鋒》,套劇嘅創作人Jed Mercurio正正係《Bodyguard》嘅編劇兼監製。

《Bodyguard》成個劇充滿真實感唔在講,對英國政治嘅爾虞我詐有極細緻描寫,另外層層推進嘅陷阱布局,以及每集一個危機,都拿揑得非常之好!

男主角搵嚟《Game of Thrones》飾演大佬Robb Stark嘅Richard Madden,佢做退役英軍David,轉投英國警隊政要保護組,因為一次制止自殺式炸彈爆炸成功,而獲委派去保護由Keeley Hawes飾演嘅內政大臣Julia,點知後期變咗嫌疑犯,成為陰謀暗殺政要嘅代罪羔羊!

成條大橋同Netflix套《Shooter》(生死狙擊)有啲似,後段都係要洗脫嫌疑,但係《Bodyguard》最精采嘅地方係佢節奏極快,疑陣布置得十分恰當,令觀眾追看時,一路被帶住走。

以下含劇透,敬請迴避!

既然小編咁欣賞頭15分鐘,當然要簡單介紹一下,作為成個劇嘅一開始,佢已經玩《末日啟示錄》嘅致敬位,用火車過隧道嘅聲音,拉向患有創傷後遺症嘅男主角David,令觀眾好容易聯想到佢前軍人嘅身份。再嚟係安排一對仔女喺列車上瞓覺,面對可能發生危險,David好果斷咁親身去查探,仍不忘叫人代為照顧子女,將佢重視家人但會因公忘私嘅個性展現,再嚟成段戲面對炸彈狂徒其實係無任何動作場面,但肉緊程度居然有過之而無不及,小編就知呢套嘢有啲料到!

其他數集嘅危機更有唔同玩法,汽車炸彈玩追車、槍擊事件又做到極強壓迫感,配樂應記一功,尾段人肉炸彈街頭行走,就玩得十分大陣仗(同George Clooney套電影《Money Monster》(華爾街綁架直擊)極之相似),更加突顯出每個危機嘅獨特性!

最可惜其實係個尾有啲太簡單嘅感覺,甚至有少許鬆散,而且為咗製造驚喜而有犯駁位出現,係最美中不足嘅地方。

尤其以下三大犯駁位最為嚴重!

1. 陰謀交叠 互有犯駁
整件事除涉及自殺式恐怖襲擊,更有暗殺內政部長陰謀、向首相迫宮、製訂全民監控嘅反恐法爭議。各個事件互有關聯,但部分陰謀理應互不相通,但最後卻構成內政保鑣David嘅連串嫌疑,真有點太離奇

2. 炸彈背心 最大漏洞
如果警探David出現阻止第一次自殺式炸彈爆炸係偶然,製作自殺式炸彈人士根本唔會製作定後面幾次炸彈案嘅材料,成個陰謀根本唔成立。

2. 人人似鬼 即捕即爆
為咗令內鬼身分保密到最後,結果每個劇中人都有內鬼特質,而內鬼被捕後,竟願意乜都爆晒,其他犯人結尾都食晒誠實豆沙包,認真兒嬉

其實英國近年面對嘅恐怖襲擊,已經同劇集電影越嚟越似,地鐵炸彈案、孤狼駕車撞議會、巴士炸彈案等等都令《Bodyguard》貼身感覺極強,能成為英國最高收視劇,實屬正常。

再加上內政部長Julia似十足英國首相文翠珊,文翠珊做內政大臣期間,多次成立反恐法案,加強監管通訊等等,佢亦成功上位做首相,成件事令人對劇集投射嘅政治環境有所對照,短短六集已經有多層次嘅陰謀,24號記得留意Netflix上架。

Facebook
https://www.facebook.com/usdramalover/posts/2276650075914959
標籤: Bodyguard  Netflix  Game of Thrones  Shooter  

留言


請按此登錄後留言。未成為會員? 立即註冊
    快捷鍵:←
    快捷鍵:→