【節目推薦】《The World's Most Extraordinary Homes / 世上最超凡出眾的家園》:睇到香港人流晒口水嘅世界級靚屋!

今晚煲劇夜唔夜 於 28/06/2018 發表 收藏文章
有時夜晚唔想睇啲太intense或燒腦嘅劇,就會揀啲休閒節目睇,每集獨立唔駛追,輕輕鬆鬆relax吓。
近排睇咗套《The World's Most Extraordinary Homes / 世上最超凡出眾的家園》,真係無改錯名,間間屋都睇到我嘩一聲!由英國獲獎建築師Piers Taylor同熱愛房地產嘅女演員Caroline Quentin帶大家環遊世界,發掘喺極端環境下突破你想像嘅房屋!

2017年出咗第一季有四集,每集圍繞一個主題(山嶺、林間、海岸、地底),主持去咗紐西蘭、西班牙、甚至阿爾卑斯山脈等等,介紹唔同房屋嘅建築設計特式同當地優美自然環境,靚到痴線,舒緩效果爆燈!劇透吓,有用廢棄飛機機翼打造嘅屋、起喺懸崖上嘅屋等等,好多瘋狂得嚟別具心思嘅設計,睇得極過癮!

以下有幾間自己最鍾意嘅屋,尤其欣賞以盡量唔破壞大自然為原則嘅設計,同自然環境融為一體,如果可以住喺呢啲地方,真係此生無憾(諗吓好啦)!

紐西蘭南島
“TE KAITAKA 蒂凱塔卡” by Stevens Lawson Architects
我鍾意呢間屋低調得嚟有個性,唔會刻意搶fo,完全融入景色中,而個景當然係世界級咁靚啦。

瑞士 阿爾卑斯山
“HOUSE ON THE RIGI 瑞吉之屋” by AFGH Architects
呢間度假屋淨係搭纜車先去到,夠晒隱世,望出去風景如畫,好似置身仙境咁,太痴線啦。

紐西蘭 奧克蘭
“UNDER POHUTUKAWA 波胡圖卡瓦樹下” by Herbst Architects
主持講咗句 “Nature comes first and the building comes second”,因為呢度係一個自然遺產保護區,間屋起喺古老原始林內,被原生波胡圖卡瓦樹所包圍。最欣賞屋主只斬去4棵樹去起屋,真正融入自然、感受大自然嘅美。

西班牙
“HOUSE ON THE CLIFF 懸崖之屋” by GilBartolome Architects
呢間屋設計極搶眼,仲要起喺懸崖峭壁上、俯瞰地中海,加上私人泳池同所有起居空間都望到海,真係屈晒機。

瑞士 瓦爾斯
“VILLA VALS瓦爾斯別墅” by SeARCH and CMA Architects
喺呢個山谷嘅一大片牧草地上,穿過唔起眼嘅傳統農舍,就會去到呢個外型非常有趣嘅地底別墅,當然又係唔少得無敵草原靚景啦。

臨瞓前幻想吓自己住嘅地方遠望廣闊草原、俯瞰無敵海景、置身隱蔽密林,淨係想像已經夠晒夢幻!總結嚟講,好療癒好好睇,推薦!

••••••••••
美劇及節目推介🌟 | 伏劇警告⚠️ | 新劇資訊💡 | 周邊消息🔊
今晚唔知煲咩好?即刻入嚟 今晚煲劇夜唔夜 睇吓啦😎!

如果喜歡我們的文章,請即分享到︰

標籤: Netflix  Homes  Design  Architect  BBC  Docuseries  迷你紀錄片  推介  設計  建築  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→