【點評】《婚姻合伙人》 – 出乎意料的驚喜!?

暫時《婚姻合伙人》播左一個星期,可能一開始對呢套劇的期望唔大,所以睇落去反而有D驚喜。演員黎講呢套劇無咩「大牌」的演員,但幾個主要角色的性格都好出(應該話演員落左的心機有回報),而且劇情都幾有笑點(可能係小編笑點低),所以暫時對呢套劇的評價唔錯(特別係《愛.回家之開心速遞》最近的劇情唔似之前輕鬆幽默,對比落呢套劇就可以睇得開心D)。



讀者可以參考以上片段。劇集出街之後,好多網民都有講原來楊明係識笑,因為郎朝勇(Guts)呢個主角一反以前楊明做過角色的形象,特別同岩岩完左的《鐵探》入面的Matt Sir(邱勵傑)同《機動部隊2019》的丁展博形成強烈的對比。仲要Guts呢個角色係一個深情男,一直係貝競枝(Kimchi)(高海寧飾)身邊默默付出,但又有D小聰明,又幾口花花。所以短短幾集已經有D幾令小編有印象的情節。例如:係唐樓樓梯「揹住」腸胃炎的Kimchi落樓去醫院,係坑渠個度幫Kimchi封戒指,因為Kimchi同個機師傾計而吃醋咁話:「女仔唔可以咁易俾人X」(好似八達通咁嘟!)Kimchi呢個角色就係一個「錢作怪」的形象,非常積極咁搵錢背後有個悲慘的童年(但做「高Ling」細個個陣的小演員真係叫得好煩下)。暫時相比男主角,Kimchi就未至於令小編係咁笑,係佢同Guts阿媽徐姹千(黃淑儀飾)個D「婆媳糾紛」情節有D火花!


除左Guts作為套劇的笑點位之外,就一定係郎朝仁(陸永飾)同施嘉露(林秀怡飾)佢地呢一Pair歡喜冤家最搶戲。郎朝仁係Office「摸Pat」的情節可以話係「少少鹹,多多趣」,當然唔係話鼓勵色情鏡頭同非禮情節啦,但可以當係附加的戲劇效果。另外郎朝仁同施嘉露係條街個到互鬧的情線亦可以話係佢地呢Pair的經典情節,施嘉露把咀利到串爆郎朝仁,但之後一齊俾警察鬧。佢地「互串」的情節暫時睇落都一定無冷場。


套劇仲有第三條愛情線,就係郎朝信(湯洛雯飾)同邢呇(黃德斌飾)。雖然兩個角色都已經出左場,但劇情仍未講到佢地呢Pair。黃德斌通常都係做一D古肅的型男,又係D角色好似唔識笑咁樣。但呢套劇入面就係做花花公子,又係同之前的對比好大,同埋呢套劇係黃德斌TVB的告別作。另外,黎緊會有份拍《法證先鋒IV》的「靚湯」湯洛雯就做俏護士,私心希望佢地呢對的劇情會多D啦!

Ref: TVB

標籤: TVB  婚姻合伙人  楊明  高海寧  陸永  林秀怡  

留言


請按此登錄後留言。未成為會員? 立即註冊
    快捷鍵:←
    快捷鍵:→