【驚奇】《婚姻合伙人》 – 四個「估佢唔到」!?

呢個星期的《婚姻合伙人》的劇情真係超出小編的想像,原本以為呢套劇只係講下郎朝勇(Guts)(楊明飾)同貝競枝(Kimchi)(高海寧飾)無論係生意上同婚姻上「合伙」,而郎朝仁(陸永飾)同施嘉露(林秀怡飾),仲有郎朝信(湯洛雯飾)同邢呇(黃德斌飾)就兩Pair人慢慢由歡喜冤家到拍拖,咁樣先至係小品。點知係Guts坐監之後,劇情突然間快左好多,Wing Wing(Guts同Kimchi個女)都大埋,而「露髀」居然係邢呇的親生女,真係估佢唔到。


讀者可以參考以上片段。「露髀」因為對佢自己親生阿爸的厭惡,而無同邢呇相認。Kimchi就因為需要邢呇的財力支援去救千秋置業(小品劇情可以連繫到黑社會,又係估佢唔到),所以Wing Wing就變左係邢呇個女,可以叫Daddy,Guts都只可以配一聲「爸爸」。同埋最重要的係,邢呇因為做完腦手術,性格都大變,由一個超有錢的花花公子搖身一變成為一個超有錢的「Sugar Daddy」,都係估佢唔到,仲要變得好顧家(其實主要係理佢自己個女Wing Wing),但都可以話係絕種好男人。


尋晚個集,邢呇就為佢的寶貝女Wing Wing開個超級生日會,好好笑嘅係邢呇唔知點解成日都可以無視CFO郎朝仁,次次見親佢都係要重新認識佢,仲要次次都係叫佢繼續努力,果然D有錢人的記性係差少少!但到Wing Wing吹蠟燭個下,邢呇提Wing Wing未許願,叫佢許埋願先吹蠟燭(唔知你有冇俾邢呇好Man咁「電」親呢?)。個下「露髀」聽呢番說話就好似阿爸親自同佢講一樣,所以佢都好聽話咁許個願,之後仲搶係Wing Wing之前吹左蠟燭!呢下咁小的舉動,其實反映「露髀」自己內心都好想認番呢個親生爸爸,睇嚟佢地相認都只係時機嘅問題。


《婚姻合伙人》呢套劇,小編開始覺得副線好似仲好睇過主線,可能因為Guts「入冊」的劇情,好似將Guts隔離左咁,到Kimchi一個人要苦苦咁撐住千秋同Guts頭家,睇到都覺得辛苦。而本身郎朝仁同「露髀」呢Pair都已經係好搞笑,到朝仁被「露髀」拒婚之後,更加係一個反高潮!但做左CFO的朝仁同「露髀」相處依然係好搞笑。最後開估下最後一個「估佢唔到」,就係小編睇深夜重播的《法證先鋒III》,先發現飾演「露髀」的林秀怡原來入行都已經一段時間(佢係套劇做陳展鵬個妹),成日仲以為佢係做《四個女仔三個BAR》先入行,至少宜家小編都會記得林秀怡有做過「露髀」呢個咁搞笑的角色!


Ref: TVB

如果喜歡我們的文章,請即分享到︰

標籤: TVB  婚姻合伙人  林秀怡  陸永  黃德斌  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→