【臥底!?】《鐵探》- 一個俾黑幫大佬打的黑幫阿嫂!?

係《鐵探》入面,有好多角色都有發揮空間。Madam Man萬晞華(惠英紅飾)、Bingo(姜皓文飾)個D主角當然唔駛講啦,就連之前備受批評的的梁競徽(前名梁烈唯)同蔡思貝,佢地的角色「快活谷」谷永正同埋阿招都多左人讚。最近幾集劇情集中講重案組(RCU)捉黑幫正龍(楊潮凱飾),所以小編亦留意多左佢女友Iris陸蔚喬(蔣祖曼飾)呢個角色。


Iris呢個角色最初登場的時間,小編無記錯的話應該係鏹水案個陣。谷永正衝上唐樓去搵擲鏹水犯個陣咁岩撞番佢做UC(臥底)識的Iris。原本以為呢個角色純粹係勾番起谷永正做UC的往事。但到劇情去到正龍「發圍」的時候,先知呢個角色有番咁上下「份量」,因為佢就係正龍哥身邊的女人,亦即係阿嫂。正常黑社會的阿嫂應該地方幾高,班兄弟都要「俾下面」,但Iris就顛覆左呢個印象,因為佢係一個受到「家暴」的阿嫂。


正龍呢個黑幫大佬又惡又要面,對住阿嫂呢D都唔會憐香惜玉,時不時就暴力打Iris,搞到佢傷哂。到左最新個集重案組捉哂正龍同佢幾個所謂的得力助手,谷永正係落口供的時候終於可以同Iris坐定定咁黎一個「真情對話」(因為谷永正熄左個攝錄機)。點解會話係「真情對話」,因為Iris係用真感情去同谷永正傾計,但谷永正就係用「真欺騙感情」的態度去同Iris傾。谷永正雖然都講過想Iris跟番佢,但今次去落口供的主要目的係萬晞華叫佢說服Iris做警方條「針」,將正龍放番出去的計劃講俾警方知。不過,事態的發展係Iris收到的料變左係引警方中伏的陷阱,因為正龍想搞死一班「眼中釘」,所以警方的人係船個度遇到爆炸。


暫時睇落Iris唔似係專登放D「流料」,只係「岩岩遇著剛剛」,而且佢真係想跟番谷永正,但呢件事就反而令到佢地兩個之間更加疏離。小編覺得Iris都真係幾慘,但呢個角色對於演員黎講應該算有發揮空間,一黎佢個角色造型好搶眼,頭髮的顏色令人印象深刻,二黎佢個角色的遭遇都好慘。唔知你覺唔覺呢?


題外話:其實尚垶(袁偉豪飾)個女晴晴都好好戲,今集因為焦慮,所以係衣櫃諗番起見到「發瘟」(方紹聰飾)個陣的情景(亦都可以話「發瘟」呢個角色造型好「爆」!!)。

Ref: TVB


標籤: TVB  鐵探  陸蔚喬  蔣祖曼  谷永正  梁競徽  楊潮凱  

留言


請按此登錄後留言。未成為會員? 立即註冊
    快捷鍵:←
    快捷鍵:→