【安心後遺症】《法證先鋒IV》終於要重拍,邊個頂上最好!?

相信大家都有同感,就係之前的劇集拍得比宜家的好,雖然理論上製片的技術同畫質一定係宜家好D,但以前的劇本感覺上真係睇緊「劇集」。小編特別係睇番夜晚重播的《法證先鋒II》時有呢個感覺,呢幾集「思琦妹」楊思琦(仲思琦妹,已經係思琦姐啦)做的歌星Sharon拒絕捐骨髓而引致的傷人案(明明無死人的案件),小編都連續追左幾晚去睇,因為呢D就係睇法證查案的吸引的地方。所以小編都好期待《法證先鋒IV》的出現,既係一系列《法證先鋒》的延續,又係李施嬅(前名李詩韻)的告別作,點知安心事件的出現,重拍已成定局。

既然要重拍,自然要有人頂替黃心穎的戲份,咁邊個頂上最好呢?小編就有以下人選(排名不分先後,亦係個人見解)。考慮到黃心穎係《法證先鋒IV》入面的戲份係第三女主角,個角色係網絡記者,相對上唔係太適合搵一D「比較成熟」的女演員,要搵番D有「青春本錢」,加上角色唔可以搶到另外兩個主要女主角的風頭。


1.蔣家旻
呢排大家都有睇過一個護膚產品的廣告,係唔知咩澳洲咩個D….(無睇過都聽過掛),就係用《天與地》的角色阿Yan去「度」呢個廣告。阿Yan既係佘詩曼,又係蔣家旻,因為大家都應該記得蔣家旻係劇集入面做年輕版的阿Yan(其實都多得個廣告提番大家)。雖然好多網民都話呢個廣告生硬,亦都話阿佘一鏡到尾好怪,但呢個廣告的確有「Noise」,連帶大家記起蔣家旻。「馬子妮」暫時除左馬子妮呢個角色令觀眾有較深印象之外,都未至於有咩角色有「代表性」。不過之前有網民話覺得蔣家旻「吧聲」好煩、好嘈,如果佢做網絡記者,反而又好似幾貼近個角色。


2.馮盈盈
馮盈盈暫時拍的劇唔算多,但做戲方面觀眾會覺得佢持續進步緊,黎緊都有三套劇集等緊出街,分別係《解決師》、《白色強人》同《極道怪咖》。作為「女神」的馮盈盈拍戲,都可以「輕易」引起係網絡上的討論度,假設佢可以頂上網絡記者呢個角色,又唔會同佢未播的劇入面的角色戲路相同,真正考下「女神」的演技!


3.林凱恩
林凱恩憑住《愛.回家之開心速遞》的Bonnie譚育英可以話係成功「入屋」。佢暫時拍的劇集都唔算多,亦可以話可以開拓更多的戲路,但因為角色上會同黃浩然有對手戲,可能係「氣場」未必「同Level」,但都可以作為新嘗試,始終觀眾都會想見多D新面孔,唔駛套套劇都係個幾個演員。唔知你又覺得邊個頂上最好呢?

Ref: TVB,各藝人IG

標籤: TVB  法證先鋒IV  蔣家旻  馮盈盈  林凱恩  

留言


請按此登錄後留言。未成為會員? 立即註冊
    快捷鍵:←
    快捷鍵:→