《娛樂大家》: 已經開始「娛樂」唔到大家!?

又到星期日,自然有《娛樂大家》,不過小編覺得節目開始到所謂的「樽頸位」。如果有睇開小編之前講《娛樂大家》的文,都知小編好中意「Cheat Chat」環節,但小編今集睇的時候,居然覺得「悶悶地」。到「Liza Magic」,嘉賓都開始好快估到Black Magic的答案。加埋其他唔係特別吸引的環節,小編有轉台去J2睇《Running Man》的意欲(其實未播《娛樂大家》之前,小編係睇《Running Man》,但亦都知道一個上左「神檯」的綜藝節目同全新節目無比較的意義,所以係度唔多講)。


先講番「Cheat Chat」環節,小編覺得呢個環節就係要睇人「中伏」先過癮。換個角度睇,一個藝人去「Set」陷阱等人「中伏」都可以有同樣效果。所以有人話:「睇人仆X最開心」,多人係遊戲入面「中伏」先好睇。唔知大家有無留意,今集的「Cheat Chat」環節參加者唔單止「中伏」次數比過往幾集少好多,仲要好多人都「舉報」。可能有D讀者唔知「舉報」係咩野黎,其實就係D參加者估到自己頭上個牌係咩內容,跟住就指出邊位參加者令佢估到個內容。小締覺得呢個「舉報」的動作唔應該係環節入面出現,反而應該係有人「中伏」之後先至當傾計咁講好D。因為當遊戲環節入面有「舉報」呢個動作,參加者成日開始係咁估自己頭上面個牌,無論「估岩估錯」都係咁亂估,變左成個環節的節奏係咁中斷,無咁有吸引力。另外「Cheat Chat」老手(例如: 陸浩(陸浩明)、Bella(林穎彤)、Jinny(吳若希)幾位)應該要暫時係呢個環節「退役」,因為佢地太熟悉個遊戲玩法,搞到無左節目剛剛出街個陣的「震撼性」。

到「Liza Magic」,之前有網民話過TVB咁公開同各個家庭觀眾玩Black Magic,咪等於完全公開左呢樣野,咁以後唔駛再同人玩Black Magic啦?小編都覺得可以咁講,但始終都會有人唔識玩,所以又未至於衰哂。但玩「Liza Magic」入面參加者的組成,就要講究好多。唔係話年齡歧視,但如果問你一個「年過半百」的人亦或係岩岩「三十而立」的人,邊個比較大機會接觸過Black Magic呢?心水清的你都知係20到30歲的後生仔啦。所以呢個環節反而唔應該咁多「相對後生」的藝人玩。另外,其實Liza姐應該玩埋一份(可以的話),唔應該做Host,咁樣應該好睇好多。上一集的「Liza Magic」好睇係因為鍾嘉欣同Benz雄一路都估唔到,今集就唔同啦。


最後一樣野,就係訪談環節真係唔應該屬於《娛樂大家》呢個節目。因為無論咩主題,訪問咩嘉賓,都好似同呢個綜藝節目格格不入。如果觀眾想睇企業發跡史,點解唔睇《錢進新世代》呢?


Ref: TVB

如果喜歡我們的文章,請即分享到︰

標籤: TVB  娛樂大家  Cheat Chat  Liza姐  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→