《娛樂大家》- Ali同黎諾懿係「Cheat Chat」最弱嘉賓!?

最新播個集的《娛樂大家》講「排隊」,主題無咩特別,但嘉賓就可以令你睇哂成集,因為有《BB來了》的「鐵三角」奶奶Madam Lo盧宛茵,家嫂Ali李佳芯,仲有聽日《懿想得到》出街的老公黎諾懿,另加聽到認得佢吧聲的Fred鄭俊弘‎。節目的重點依然係「Cheat Chat」環節同埋「Liza Magic」,今集的「Cheat Chat」入面嘉賓頭上個牌多左平時Send message成日會用到的Emoji,因為表情其實比起做某個動作為講某句說話易中,所以幾乎頭上一抽中Emoji牌,基本上中招就係時間問題。


讀者可以參考以上片段。係「Cheat Chat」環節,今次阿姐無一開始屈D嘉賓中招,而係直接Trap「女神」Ali,係未準備好的情況下Ali就直接話自己唔鍾意排隊,就即刻中一招先。係Ali中招接受懲罰的時候,Arnold郭子豪就突然間大叫「等等」,原來佢諗住「舉報」,呢下應該破左呢個遊戲入面最快舉報的紀錄。佢就話林師傑無啦啦叫佢個名,林師傑諗住幫自己辯護就話:「等陣先,點解你會懷疑我先,我想將個份歡欣同埋愛帶番俾你之WO」(福音戰士!?) 郭子豪就堅持舉報,仲直接講到個牌係「隔空撃掌」,一講就中真係利害,睇黎佢都可以好似陸浩(陸浩明)佢地正式進入「Cheat Chat」老手的行列。


但郭子豪都未夠Madam Lo咁勁,佢應該係小編有睇「Cheat Chat」環節至今唯一一個完全無接受懲罰的嘉賓(有錯請指出),即係佢完全無俾其他人Trap到又或者「自爆」,就算連阿姐、森美個D有心Trap佢的時刻佢都可以輕鬆避過(Madam仲講笑話自己好多年前或者會去殘廁Gathering),果然係「做得人地阿媽最多的演員」,見慣風浪!佢阿仔黎諾懿同家嫂Ali就調番轉,不停中伏同「自爆」。「電競王」Brian謝東閔的「燒春雞」又引到「港普代言人」黎諾懿澄清自己個仔叫「小春雞」,之後黎諾懿自己又亂舉報「用普通話講野」,當然唔少得示範港式普通話,又中招,最慘係連講英文介紹下「神之馬壯」都中伏。


Ali係好成功咁舉報左一次「討厭排隊過隧道」之後,亦都有成功舉報係「女神」隔離好緊張的丁子朗,但之後就好似黎諾懿係咁中伏同「自爆」。罰錢罰幾多又中招,連想「舉報」個下又中招(應該係第一個諗住「舉報」而中招的人),因為伸左隻手出黎。Ali同黎諾懿呢對《BB來了》的夫妻應該係中招最多的嘉賓!!


Ref: TVB

標籤: TVB  娛樂大家  李佳芯  Ali  黎諾懿  盧宛茵  鄭俊弘  

留言


請按此登錄後留言。未成為會員? 立即註冊
    快捷鍵:←
    快捷鍵:→