《大帥哥》- 愈見進步的舞川奈伊(天嬌嫂) 精選

《大帥哥》劇情開始進入「戲肉」，尋晚個集係天嬌嫂(譚凱琪飾)的「告別作」，因為佢係逃走過程入面俾馬炭(洪永城飾)處決左。既然天嬌嫂已經「魂歸天國」，小編都想係度講下天嬌嫂佢演技的進步。



讀者可以參考以上片段。狄奇、天嬌同沅婉(蔡思貝飾)係場戲入面要對質。係0:18個度開始，天嬌嫂「個人SOLO」咁講番佢作為一個小女人想依靠夫君的願望，「大帥哥佢真係真心真意想同我長相撕守呢」、「我好想真真正正咁做大帥哥的女人」、「我想做你的妻子」、「甚至乎我可以背叛自己的國家，同你雙宿雙棲，遠走高飛」……係睇天嬌嫂講心底話的時候，小編覺得譚凱琪可以將角色的無奈感表現到出黎，因為葉天嬌呢個角色本身佢為一個日本間諜，已經同狄奇呢個軍閥就已經有角色對立。呢種落差加埋佢覺得俾背叛的心情，係呢場戲都有充分的展示。

小編對譚凱琪有印象的戲唔太多，最有印象的係《致命復活》同《不懂撒嬌的女人》，特別係「Mall姐」(宣萱飾)的手下Annie。個陣對譚凱琪的印象就係佢做戲「好俾力」。何謂「好俾力」呢?就係作為觀眾你會覺得演員有俾心機做個角色，但又會覺得演員未係好Fit個角色。但今次的天嬌嫂，小編覺得佢將天嬌最初柔弱女人的形象，到顯示出日本間諜個種女強人感覺，佢都Carry得好，直到今集「告別作」同大帥哥講最後的心願，都見到譚凱琪的進步。黎緊開始開拍的《降魔的2.0》都宣佈會有佢份，期待佢下次的角色。
Ref: TVB