【又大陸劇?】《幸福一家人》 – 內地版的「愛回家」!?

係睇完《愛回家》的樓盤廣告雜誌之後(雖然入面係用番《愛.回家之開心速遞》的人物設定,但演員係用番自己真名),先諗緊仲有咩劇好睇的時候,就見到《幸福一家人》首播。當然會有人話上網應該已經可以「煲哂」成套劇啦,但因為小編無網上追劇的習慣,而且星期六的夜晚無咩好睇的情況下(其實最主要係各大足球賽事都完左!!),所以就試下睇下呢套內地的家庭劇。睇完之後,小編的感覺就係,呢套劇咪就係內地版的《愛.回家之開心速遞》?!


套劇入面的演員,其實小編只係認得兩個人,叫得出名的就得一個,個個就係女主角董潔,因為之前係TVB播的《三國機密之潛龍在淵》有睇過佢做唐瑛唐皇后(個陣其實主要係想睇《無心法師》的韓東君所以開始睇)。另外就係今年新年的時候TVB播由周迅同霍建華主演的《如懿傳》,董潔係入面飾演富察皇后(其實同之前《延禧攻略》由秦嵐做的富察皇后係同一個角色,但性格上比較陰險)。小編覺得董潔的演技幾好,但《幸福一家人》係小編第一次睇佢做的時裝劇,佢個角色令我諗起又係辦事能力高的熊若水(呂慧儀飾),因為董潔飾演的房天心房秘書,又係個種女強人的特質。


另外一個認得但唔知佢咩名的,就係男主角翟天臨(睇完套劇先問Google大神),因為之前《守護神之保險調查》入面某個單元佢做MC Jin個朋友阿Ben。睇左兩集之後,小編覺得房永福呢個單親阿爸,個角色定位就好似根叔熊樹根(劉丹飾) ,又係一個人好辛苦咁養大D細佬。另外套劇入面的房小龍,角色性格上又好似我地平時日見夜見的金城安(安仔)(S.O.) (周嘉洛飾),又係成日撞板、衝動又搞笑的角色。當然只係小編暫時睇左兩集的觀感,但小編的確覺得呢套《幸福一家人》真係好似內地版的《愛回家》!


話雖如此,就算內地劇的質素提升左好多,演員的顏值同演技有幾好,TVB會唔會播得太多內地劇呢?只係短短一年,觀眾已經俾一系列的古裝內地劇洗禮。首先係《延禧攻略》(無可否認套劇的口碑同收視都好!) ,跟住就有《皓鑭傳》、《如懿傳》同《獨孤天下》的三連擊(《獨孤天下》因為30分鐘一集咁播,播到宜家都未播完),又有一D同內地的合拍劇,都唔係好對香港人胃口(例如:剛才有提到的《守護神之保險調查》)。到左星期六晚,又黎《愛回家》之夜(港版內地版打孖上)。雖然會有人話,你可以唔睇,但小編作為土生土長睇電視大的一輩,都唔希望TVB只係識「狂買狂播」大陸劇,唔知幾時先可以多番D本地製作的劇集呢?

Ref: TVB,網上圖片

標籤: TVB  幸福一家人  董潔  翟天臨  

留言


請按此登錄後留言。未成為會員? 立即註冊
    快捷鍵:←
    快捷鍵:→