[劇評]唔只有靚女睇,劇情仲好貼地、動人嘅《親親我好媽》,今個禮拜先進入高潮!!!

My Movie Style 於 21/02/2017 發表 收藏文章
hello,大家好丫,都有一排無寫劇評LA,估唔到一寫就係寫大台嘅劇《親親我好媽》。雖然呢套係大台嘅劇,但今次出奇地唔膠之餘,仲好貼地好睇,所以冇計,一定要推介比大家追下。
今次嘅劇評同以往一樣都係會分成3部分,1)優點,2)缺點,3)未來值得期待嘅地方。
1)優點
首先講下呢套《親親我好媽》有咩咁好睇先啦,1)演員選角出色,2)角色夠實感,3)劇情貼地。

1)演員選角出色
選角方面如果大家有細心留意,本劇中戲份最吃重的三人,江美儀、黃智賢和陳敏之平常都係做開配角甚少擔正做主角,但由於今次呢套劇主題圍繞住家庭、學校比較日常生活化,所以選角不宜太「明星」,本劇用上嘅江美儀、黃智賢和陳敏之外形上算是比較平凡,可以話係連選角都貼曬地!除此之外,我認為有幾位演員到目前為止的表現都令人眼前一亮,他們分別是江美儀(飾查向善、嚴太)和江嘉敏(飾嚴茜瑜、Venus)。

先講江美儀,係睇《親親我好媽》我一直都覺得江美儀係一位敬業嘅好演員,我對佢最印象深刻就係佢同馬明係《衝上雲霄2》入面嘅忘年戀。雖然網民都紛紛話好重口味,但我就睇到江美儀嘅專業精神。(講真上左年紀仲要拍床上戲,好多演員都放唔低心理包伏)而講到演技方面就更加係無庸置疑,多次提名最佳女配角,2013年更加憑藉《衝上雲霄II》勇奪「最佳女配角」獎項。入行多年都係做配角,今次終於有機會擔正做女一,表現果然冇令人失望。
江美儀今次係飾演一位性格好強嘅「虎媽」,由監督女兒做攻課,催女兒練琴,到為女兒前途到處奔波(找小學時求校長,幫女兒找鋼琴名師)都入型入格,彷彿令我看到以前的母親一樣。令我印象最深刻的莫過於係江美儀鬧女果個語氣,完全同小編母親一模一樣。佢嘅演出不但令我加強左代入感,更令我重溫左多年前被老媽子鬧嘅惡夢~
(唔知大家又覺得似唔似?)
但除左鬧之外,擔心一樣到位。之前劇情講到第10集女Echo俾人搶電話,但是知道女兒平安無事之後果種屬於小擔心。而同一集結尾,Echo因為意外入院,但不知女兒情況下的擔心,對比前面的更加有深度,再加上自己老公不在旁雖然無助,但又因為要安慰大女Venus而又唔可以表現得好驚。兩場戲比較之下就發現江美儀演技好有層次。

(第一段)
(第二段搵唔到片)


講完媽媽之後就梗係講個女LA,其實早係岩岩開播嘅時候飾演Venus嘅江嘉敏己經被網民留意,仲好似比人封左做新一代女神(好似係,除非唔係)。江嘉敏個樣固然係好pure好true,但更值得留意嘅係佢嘅演出。
江嘉敏今次飾演嘅係一名應屆DSE考生,首先在外型上已經贏左一半,江嘉敏今年先22歲,着返件校服可以話毫無違和感。不過外型點好都冇用,點都係睇演技最實際。
劇中嘅Venus正值少女,情感亦都係咁多位角色中最多的。在學校,有暗戀Hayden嘅苦同甜,一時好嬲Hayden,一時又好掛住人。在家,又有和「虎媽」相處嘅矛盾,一時好感激母親嘅栽培,一時又覺得母親干涉太多自己嘅私生活。各種情感江嘉敏都能拿捏得不錯,尤其是她和Hayden打情罵俏生氣時,真心Girlfriendable,好似初戀時候激親女朋友果時咁。
雖然江嘉敏演技仲係有D青澀,但係至少都好過某菲律賓大學嘅港姐。(唔知大家點睇)

另外都想講下黃智賢同細女Echo,黃智賢都係一個好演員,但佢嘅角色嚴夏在前期發揮空間不多,所以暫時唔講住,但隨住劇情推進,嚴夏嘅戲份和情緒都會愈來愈多,所以我將佢放左係最下面[未來值得其待嘅地方]再討論。至於細女Echo,我係第一次睇佢演出,但見佢演出「老成」唔怯場,又能清楚流暢讀出對白和表達情感,童星來說真的優秀。可惜戲份太少,但假以時日必成大器~
(對比同劇另外兩位童星,Echo算係超班)

2)角色夠實感
一個真實的人應該係有唔同嘅面向,不論正面或是負面。而一個活生生的角色是由複雜嘅情感同多種性格組成的。如果過份角色強調角色嘅好或壞,只會令人物失去實感,欠缺人性化。就以剛結束嘅《乘勝追擊》做例子,陳展鵬飾演嘅蔣冠一特質有好多,如深謀遠慮,重情重義,行事果斷等,在劇中簡直就是完美的存在。相反,吳岱融所飾演嘅蔣天龍心狠手辣,無情無義,以劇中的表現來說二人是極端的存在,一個極正,一個極邪,但正正因為這樣才令角色沒有實感,因為現實中沒有絕對的對錯之分只有觀點和角度。

對比起《乘勝追擊》人物,《親親我好媽》角色就有實感得多。劇本嘗試令大部分主要角色都有2面,1面對外人,1面對家人。如江美儀所飾演嘅嚴太,在家對女兒、老公都十分嚴謹,要掌握家中一切嘅大小事忙務,更甚者對自己的母親也是十分強硬,但對住外人總是恭恭敬敬客客氣氣, 例如係PTA無論高太如何蠻不講理也好,嚴太都總會耐心解釋。又如黃智賢所飾演嘅嚴夏,在外是一個專業有原則的建築師,但在家就變成了一個可為家庭放棄一切的幸福小男人。就係呢D小小嘅細節,足以令角色有質感,再加上之後戲情發展,唔難想像角色之間會充滿不信任,更甚可能是背叛,令角色更有血有肉。

3)劇情貼地,令人共鳴
本劇討論咗喺現今嘅教育制度弊病下產生出嚟嘅兩種怪獸家長,一種係為子女安排好成一切嘅虎媽,而另一種就係幫子女解決曬一切問題嘅直升機母親。劇中嘅嚴太同高太正正係表達緊兩種母親嘅極端,而呢個都正正係香港所面對緊嘅局面。劇情內容固然係貼地,但本劇細節同樣令人有共鳴。例如有一幕細女Echo趴左喺床上面做功課,阿媽見到就梗係即刻鬧佢la。
(我講過幾多次 叫你唔好趴係床度做嘢呀~)


隱藏的第四點:沒有蔡思貝
之前小編無野做打開電視就見到電視播緊味想天開,一聽到蔡思貝嗰啲煩膠高音已經嬲嬲哋想轉台,再睇埋佢同洪永城啲演技,OMG!真係喊出嚟!其實全套劇啲人都好好戲,但唯獨係嗰兩個主角d戲生硬到...
其實大台正值新舊交替嘅時期,用新演員係無可厚非,但做得主角就梗係要有番咁上下實力啦,你推過連戲都唔識做嘅蔡思貝出黎,仲要一做就做主角,咁係咪侮辱咗其他人嘅努力呢?相反江嘉敏呢啲又靚又好戲嘅就唔用,死都要用親生女,我心諗你都XX
(雖然當年鄧萃雯都係演藝訓練班出嚟就做女一,但係至少人哋好戲)

講完優點就係時候講缺點,我認為呢套劇有兩大缺點,1)呂慧儀, 2)劇情套路重覆

1)呂慧儀
呂慧儀喺劇入面飾演一名有公主病的直升機母親,其實我覺得呢個角色係想將現時香港直升機父母呢個問題 用一個幽默同諷刺嘅形式誇張咁呈現出黎。只不過呂慧儀嘅演技實在係有啲浮誇而且佢把聲都真係幾煩,尤其係佢每講完一句句子最尾都要加個「囉」, 有類似蔡思貝嘅感覺。但係都幫呂慧儀講返句la,呢個角色其實本身嘅設定就乞人僧,所以今次令人覺得煩膠有一半都黎自角色,雖然演技就真係浮誇咗啲,但點都自然個蔡思貝嘅~
2)劇情套路重覆
不過呂慧儀都只不過係小小嘅缺點,最大嘅缺點始終都係劇情套路一成不變,重複又重複, 小編同大家一樣都係喺香港長大,自然都係睇tvb嘅劇大啦。自從近年冇咗競爭之後啲編劇連劇情套路都懶得諗,套套幾乎都一模一樣只是主題不同,演員不同。老老豆豆睇完第一個星期之後真係可以估到曬後面劇情大概點樣發展,首先最經典嘅就係嚴母教女,因為過於干涉和控制女兒,到劇情中途必定反目,但最後和好。其次係前期表現得十分恩愛嘅主角夫婦,必定會出軌或有誤會。其實本身我都不敢肯定,但直到Venus問佢媽媽(江美儀)你唔驚老豆偷食咩? 媽媽(江美儀)就話:「唔洗驚!你老豆擔屎都唔偷食~」我就知,實出事la。

睇到呢度我知你哋一定會話我馬後炮,咁我就喺度大膽估一下之後嘅劇情啦。
----------------------------------------------------------唔想睇既就直接跳過----------------------------------------------------------
.
.
.
.
.
首先Venus一定會因為Hayden再同媽媽嘈交,繼而反目。傷心嘅Venus去揾Hayden傾訴,Hayden係開解Venus嘅過程中同Venus表白,而Venus亦幫到Hayden搵到明確嘅目標令佢開始奮鬥,繼而同家姐和解。
同一時間媽媽同爸爸因為再爭執而決定分開冷靜,屋企突然之間變得四分五裂,但最後細女發生一些意外或危機,令到屋企人再次團結起來,係解決呢啲危機之後,再加上眾人嘅調解,所有人冰釋前嫌,BBQ結局。
.
.
.
.
.
(我諗唔中十成都中九成咖la,小編相信唔洗請苗僑偉出黎)
---------------------------------------------------------------------------------------------------------------------------------------------
3)未來值得期待嘅地方
我認為本劇未來最值得期待嘅地方,有兩組嘅對手戲同埋感動嘅和解。

第一組是黃智賢同江美儀嘅對手戲,我在上面都提過黃智賢也是一位很好的演員,只不過在前期,他發揮的地方不大,但隨著劇情推進,爭吵只會越來越精彩激烈,同時又要在女兒面前裝作無事,十分考驗演技。在昨天播出的第11集。就已經見得到,但這只不過是開始,預期未來將會有更加激烈嘅對手戲。

第二組是江嘉敏同江美儀嘅對手戲 雖然我上面都講過江嘉敏到目前嘅表演都是不錯,但係真正的考驗,現在才開始,難點在於她要如何表現出內心嘅情緒變化,由最初對母親的敬畏,服從,去到後來的反叛,想要自由的情緒。

第三點則是一個感動的和解,雖然有一開始就知道結尾將會是BBQ結局,但我仍然希望你BBQ得嚟唔好咁hea。

總結:
雖然呢套劇唔會話有咩劇力萬鈞嘅情節,但係都總算係一班有實力演員支撐住嘅劇集,再加上劇情貼地令人有共鳴,實在值得一睇。其實睇呢套劇嘅時候,都勾返起好多以前讀書嘅回憶,以前可能唔明白點解阿媽會一直逼我讀書之類,但係依家人大咗明白其實阿媽都係想我哋好,所以小編想喺呢度同自己嘅母親講返聲:「多謝你,一直以嚟嘅栽培」同埋希望咁多位睇完套劇又或者係我篇劇評都要多多考順你哋嘅父母,珍惜眼前人。

希望大家會繼續支持我LA ,中意既就比LIKE,唔中意既都可以留言比D意見我嫁。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Rex  Man
    Rex Man 於 21/02/2017 評論 NO. 1

    其實你係咪TVB打手黎?

  • Hei Heinze Chow
    Hei Heinze Chow 於 21/02/2017 評論 NO. 2

    點入高潮啊?要2000尺喎

  • Yeung Ching Ho
    Yeung Ching Ho 於 21/02/2017 評論 NO. 3

    呢套野静係想睇個後生仔啲劇情,不過尋晚果集黃智賢同江美儀嘈交果幕幾好睇

  • Hei Pk
    Hei Pk 於 21/02/2017 評論 NO. 4

    收左tvb幾錢丫

  • Roy Ho
    Roy Ho 於 21/02/2017 評論 NO. 5

    咪一9樣....18歲成個傻hi咁

  • John Lui
    John Lui 於 21/02/2017 評論 NO. 6

    成日出po講tvb新舊劇 同埋啲姐仔

  • Man Kin Poon
    Man Kin Poon 於 21/02/2017 評論 NO. 7

    唔好淨係識盲反好唔好?

  • Joe Ho
    Joe Ho 於 21/02/2017 評論 NO. 8

    呢套劇貼近現實,至少劇情唔似之前d膠劇咁離地,算係tbb近年比較有質素既劇集

  • Fok D Charles
    Fok D Charles 於 21/02/2017 評論 NO. 9

    琴晚果集有入樽睇 仲正過nba all star

  • Kevin Lee
    Kevin Lee 於 21/02/2017 評論 NO. 10

    好睇,昨晚江美儀同黃智賢鬧交果斷勁正,兩公婆鬧到青根現晒。勁真實呀!

  • Gary Chung
    Gary Chung 於 21/02/2017 評論 NO. 11

    要睇好多套只發現有—套好睇的話... 结論係:唔值得浪費時間。

  • Calvin Lam
    Calvin Lam 於 21/02/2017 評論 NO. 12

    攻課點攻法?

  • Ar Tong
    Ar Tong 於 22/02/2017 評論 NO. 13

    我都覺得琴日嗰場好真,我覺得佢哋真係似鬧緊交,我一路睇一路諗緊佢哋完咗之後會唔會大家講對唔住,真係嘈得好真

  • Li Wing Kin Alfred
    Li Wing Kin Alfred 於 22/02/2017 評論 NO. 14

    一仔好正!!🤘

  • Chong Wp
    Chong Wp 於 22/02/2017 評論 NO. 15

    果頭先比人話打藍球果幕膠

  • 張嘉倫
    張嘉倫 於 22/02/2017 評論 NO. 16

    套戲正 笑點多正抽筋😂😂👍👍

  • Danny  Yeung
    Danny Yeung 於 22/02/2017 評論 NO. 17

    Tvbfanspiece

快捷鍵:←
快捷鍵:→