又開學啦喂~不如睇番套戲輕鬆下~今個月既戲有笑有喊有驚又有打,梗有套啱你睇

佛系娛樂台 於 24/08/2018 發表 收藏文章
大家好丫,唔知講起九月大家會諗起咩呢?學生哥們一定係最痛苦既,因為又要開始番學喇~除此之外,九月份一般俾人既印象都係冇咩戲睇,因為啱啱先過完暑假檔期,應該冇咩大片要上,但今年一反常態喎,就算嚟到九月一樣咁多野睇,雖然九月片「卡士」一定冇暑假檔咁大,但勝在片種夠多,有動作片,鬼片,搞笑片...總有一種啱你睇~

先講第一套《鐵血戰士:血獸進化》:
今次呢套新既鐵血戰士其實同以前都一樣會係主打動作,劇情係點都係次要,作為爽片嚟講未睇都知合格,因為今次既導演Shane Black同樣係《Iron man3》既導演,《Iron man3》不談劇情只講電影節奏同動作安排,係荷里活入面都係一流之作,所以我對今次既鐵血戰士都幾有信心,一向係動作片同科幻片既fans唔好錯過啦~
推薦程度:★★★★★★★☆☆☆

第二套 港產電影《告別之前》:
劇倩:
性格樂天的昕翹 (李靖筠 飾) 是一位新入行的社工,專門負責癌症治療小組的個案跟進工作。 她獲分發了三宗跟進個案,分別是生於小康之家但不幸患上血癌的小女孩欣欣和她的父母 (張繼聰 及 衛詩雅 飾) ;新婚在即卻突然發現腦內長了腫瘤的嘉純 (談善言 飾);還有年屆八十,只剩最多一年壽命的獨居老太太蘭姨 (羅蘭 飾)。三位病人面對疾病都抱著不同的心態,但同時有一個共通點——與死亡越走越近,距離跟摯愛告別的時刻也越來越近……
港產片一向冇華麗既特技同鋪天蓋地既宣傳去吸引人既目光,想突圍而出靠既一向都係劇情同演員堆砌出嚟既誠意,八月就有一套誠意之作《逆流大叔》而九月就有《告別之前》。今次呢部《告別之前》由羅蘭姐主演,「龍婆」幾好戲相信唔洗我講大家都知,今次仲要加埋張繼聰、衛詩雅等一班好演員,靚材料就有啦,之就要睇導演煮唔煮到一手好餸~再加上今次主題為離別,屬於最易打動人既題材,中意喊住係戲院出嚟既朋友千祈唔好錯過~
推薦程度:★★★★★★★★☆☆

第三套 日本電影《我老婆日日都扮死》:
劇倩:
阿淳某日放工回到家,見到老婆千惠倒在血泊中,大驚失色後發現原來是老婆的玩笑。 阿淳驚魂未定,千惠卻覺得十分好笑。 阿淳追問老婆為什麼要這樣做,卻得不到答案。自此之後,他每天回家都會見到「已故」的老婆,死因花樣百出。 阿淳漸漸擔心老婆這樣做的原因,是她厭倦了婚姻?還是她在尋求幫助?
啱啱介紹完一套將會喊到你死既電影,不如我地又睇下呢套可能令你又笑又喊既日本電影啦~日本電影最出名就係騎呢,你只睇戲名係永遠唔會估到佢想講咩(e.g,我想吃掉你的胰臟),今次睇完呢個預告片真係勾起到我既好奇心,只睇預告都會知呢套電影既調性會係偏向搞笑,但最後結局應該都會幾動人,作為輕鬆小品會係一個唔錯既選擇。(P.S.如果大家覺得女主角好熟口面,比個提示你,你應該係睇過求婚大作戰)
推薦程度:★★★★★★★☆☆☆

第四套《特務戇J:神級歸位》:
基本上都冇咩好講,由頭搞笑到尾,《特務戇J》出到第三集,繼續由「戇豆先生」同佢特務助手演出,九月份想笑觀眾既首選,都好適合一家大細去睇~
推薦程度:★★★★★★☆☆☆☆

最後係鬼片《詭修女》:
一個隱居於羅馬尼亞修道院的年輕修女自殺身亡,一個有靈異經歷的神父和一個即將發誓終身修道的見習修女,被梵蒂岡教廷委派到當地調查事件。他們發現了修道院的邪惡秘密,令兩人不單生命受到威脅,他們的信仰和靈魂也面臨考驗。他們合力對抗曾於《詭屋驚凶實錄2》現身、化身成詭異修女的邪靈力量,令修道院成為人和邪靈的恐怖戰場。
呢套《詭修女》係《詭屋驚凶實錄2》(又稱《厲陰宅2》)入面非常搶戲魔鬼修女既外傳電影,《詭屋驚凶實錄》呢個系列有幾紅,相信有睇開鬼片既觀眾都唔會陌生,而且呢套戲係由《詭屋驚凶實錄》1、2鬼才導演溫子仁監製同撰寫劇本,所以都有唔少信心~
推薦程度:★★★★★★★☆☆☆

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→