林峯神劇《使徒行者3》宣佈開拍，盤點潛在女主角！ 推薦

自上星期TVB宣佈林峯「強勢回歸」TVB、加盟星夢娛樂後，相信大家都會好期待林峯再次拍劇、唱劇集主題曲。阿峯當日喺唔同嘅訪問中都提到即將會有合作計劃向大家公佈，同時都表示自己對未來嘅工作充滿期待呢！

直至喺尋日嘅影視娛樂博覽中，TVB都一如既往「大曬冷」，宣佈即將會播出嘅劇集，而其中一套就係《使徒行者3》。《使徒行者》喺2014年播出時，林峯飾演薛家強（爆Seed），一改公子形象，充滿江湖味，加上同「釘姐」丁小嘉 (佘詩曼飾)嘅情深，令唔少觀眾都大讚佢「好戲」！當年劇集「叫好又叫座」最高收視達37點，但可惜都令林峯飲恨視帝！
至於《使徒行者3》預計今年年中即將開拍，暫時只公布兩位主要演員：「爆Seed」林峯、「覃歡喜」許紹雄。


有兩位演員已經公佈，未知女主角會由邊一位女演員出任呢？小編就綜合咗幾位潛在人物：

1. 佘詩曼

身為第一輯女主角的「釘姐」余詩曼，當然是最大機會成為 女主角，加上近年佘詩曼因為《延禧攻略》而喺內地爆紅，各樣因素都對收視有幫助。加上，阿佘同林峯多次合作拍劇，自然默契十足！



2. 黃翠如

第二輯女主角黃翠如都有機會成為人選，但如果論演技就應該比唔上拍劇十幾年嘅林峯。但啊峯又未同新一代花旦翠如合作過，相信可以為劇迷帶來新鮮感。

3. 胡定欣

「視后」胡定欣經常飾演性格硬朗嘅打女角色，又有一身Fit 爆身型，絕對適合劇中有打鬥、追逐場面！


4. 李佳芯

如果要睇Ali 做打鬥戲，應該都幾有趣。但如果唔係打鬥情節的話，Ali 同林峯拍談情戲份的話，好有可能會呈現出「林峯 X 鍾嘉欣」嘅純愛感覺。

小編私心都係想睇爆Seed同釘姐再次合作，加上聽埋林峯自己唱埋劇集中嘅歌曲，就十全十美喇！如果真係要安排同其他花旦、小花合作的話，改成開拍《大唐雙龍傳2》、《談情說案2》，可能效果會更加好呢！

Ref: Youtube、Instagram