新一代笑匠!《荷里活有個大老千》Babyjohn 爆笑演活經典呂奇一角

小眼睛看大娛樂 於 31/01/2019 發表 收藏文章
早前已經寫過幾篇同《荷里活有個大老千》有關嘅文章,都係集中於整體嘅亮點、女角,但今日就係要講下宣傳活動當中「被消失」嘅BabyJohn(蔡瀚億)。


本身都對呢套劇無抱住太大嘅期望,畢竟唔算太鐘意同賭主題有關嘅劇集,只係好隨意睇下。但近呢一兩個星期開始多咗Babyjohn 飾演嘅舒奇同好兄弟「墨基」(吳業坤 飾)嘅互動,日日密集式見到佢,就發現咗Babyjohn嘅骨子裡係有一份喜劇味道!

如果有留意開「公仔箱」的話,應該都會記得佢上年有參與過王祖藍班底嘅《老表畢業喇!》,佢參考再改成獨特嘅口音,扮演一個從外國返香港嘅ABC,當時仲爆出唔少笑話、金句,最好笑莫過於佢將R.I.P (Rest in Peace)誤解成Rich is Poor,呢個對白係王祖藍式喜劇當中唔算最好笑,但配上BabyJohn把聲,真係一絕!一個鬼馬嘅tone的確會為對白加唔少分!


小編要舊事重提,係想講Babyjohn會用上有趣嘅聲線、腔調去加重角色嘅喜劇感!試諗下,如果只係用一把普通嘅男仔聲,無咗份外國音,真係會相差十萬九千里!

言歸正傳,講下點解會覺得Babyjohn喺《荷里活有個大老千》中扮演嘅「舒奇」(劇中自稱小舒奇),點樣可以令佢可以接棒成為笑匠接班人呢?

以下純屬個人意見:

1) 扮聲了得

舒奇有一次因為被尋仇嘅人用棍打傷,結果要入醫院休養,仲要嚴重到失聲!結果劇中嘅一大班好朋友就出盡法寶幫佢開聲,果個由無聲到出番聲(奇怪聲)嘅短短十幾分鐘戲,Babyjohn嘅扮聲功力的確加咗唔少分!小編當時睇完都忍唔住再上mytv重溫,真係好好笑。

仲有呢段開聲聲後去試戲嘅情節:



2) 青靚白淨

同劇中嘅身各個男女演員相比,論白滑程度,Babyjohh真係數一數二。可能你會話青靚白淨同好笑有咩關係?

但就正正係因為呢個同既定笑匠形象(肥、矮、不修邊幅)有太大反差感,就會更加來得好笑。「正經嘅人做奇怪嘅野係最好笑」,呢個說法就係相同嘅道理。




又用劇中嘅另一演員「坤哥」吳業坤做例子,佢唔係屬於靚仔路線,只係一副普通到唔普通嘅樣,仲要除咗眼鏡後更加衰衰格格,當佢一出場,大家都會有種諗法:「又係咁.......」、「估到佢喇!」......唔係話佢唔好笑,但佢呢一種形象太過固定,就係既定嘅笑匠設定,喜劇感自自然然無「青靚白淨」嘅Babyjohn咁搶!


3) 鬼馬笑容

Babyjohn本身牙係有少少唔齊,有隻老虎牙,當佢輕輕笑嘅時候都會不經意咁露出隻小虎牙,令佢偷笑、奸笑、微笑嘅時候更加有趣、好笑,令人不自覺都受佢嘅笑容感染而一齊哈哈大笑呢!




期待Babyjohn會再有其他畀佢發揮自身喜劇細胞嘅作品啦!


Ref: TVB




標籤: Babyjohn  蔡瀚億  

留言


請按此登錄後留言。未成為會員? 立即註冊
    快捷鍵:←
    快捷鍵:→