【年經】新年一定睇過嘅TVB節目 玲玲姐、汪阿姐、夏蕙BB任你揀!

小眼睛看大娛樂 於 31/01/2019 發表 收藏文章
每年農曆新年,無論係去親朋屋企拜年,抑或係獨留在家中(但利是照袋),相信大家都會好似小編咁打開電視睇下,當睇咗十幾二十年後,你就會明白到TVB每年都好貼心咁照顧大家,準備咗好多好「精彩」嘅賀年節目,大家唔多唔少都有睇過嘅!

1) 夏蕙姨上頭炷香

每年新聞都會直播善信去黃大仙祠上頭炷香嘅情況,最大亮點一定係每年都會悉心打扮成當年生肖嘅黃夏蕙!(期待~)



2) 堪輿學家大講運程

每年年廿幾開始,就會播出《新春開運王》,邀請各大堪輿學家,例如:蘇民峰 、麥玲玲 、李丞責、李居明、蔡伯勵等等,同大家分析各個生肖嘅來年運程,又會教觀眾點樣可以趨吉避凶!小編明知年年講嘅野都係差無幾,但年年都會好緊張咁聽住自己同屋企人嘅生肖運程,講得好嘅咪笑下,都係想求個安心啫!但想問問蘇民峰師傅今年無影嘅?



3) 倒數大年初一嘅節目

每年年三十晚都安排倒數節目,都係安排歌手、藝員大唱賀年歌,又或者玩下同新年有關嘅小遊戲,當然唔少得倒數大年初一嘅來臨。藝人、歌手都會攝下節目時間而車輪式講出賀年祝福說話,但當大家都係講身體健康、工作順利嘅時候,有一年坤哥就殺「大王」安德尊一個措手不及,祝大王同李錦聯師傅「一團和氣」,大王當下真係唔知好嬲定好笑喇!



4) 由阿姐領軍嘅賀年節目

咁重要嘅大年初一,TVB又點會唔陪住大家呢?每年嘅年初一晏就時間,就會有汪阿姐主持嘅賀年節目,年年都聽到阿姐經典賀年歌,真係唔聽會唔安落!阿姐嘅歌聲固然可以令大家「耳朵懷孕」,但都唔好錯過留意靚靚嘅3位應屆港姐冠亞季啊!仲有財神爺喺電視出沒啊!


5) 「特別版」都市閒情

都市閒情平時講開生活消閒、婦女熱話,去到新年就會變陣成另一個賀年節目,又係一大班主持同嘉賓玩遊戲,或者抽下獎。上年係叫《都市閒情之安齡初一冇時停》,今年就會叫做《流行都市之安宋豬年冇時停》,兩個名咁似嘅⋯⋯可惜無咗李師傅同大王嘅火花,但都可以睇下宋芝齡、「大小姐」林淑敏、姚嘉妮,同埋美棋BB!


6) 新春花車巡遊、煙花匯演

到晚上時間,TVB就會喺年初一、二分別現場直播喺尖沙咀一帶嘅新春花車巡遊同埋煙花匯演。每年都有唔同地方嘅花車、特別嘅煙花造型睇,但點都唔及現場睇嘅果一種氣氛呢!人逼人咁過新年先至開心!


7) 賀歲劇

賀歲檔期又被稱為炮灰期,唔少被睇低一線,又或者係所謂嘅倉底劇,都會被安排喺呢個時期播出。主題都係輕鬆搞笑,又或者同新年有關,就好似2016年嘅《公公出宮》、《警犬巴打》,以及2017年新春期間播出嘅《財神駕到》、《味想天開》!今年就安排咗《荷里活有個大老千》、《皓鑭傳》。


8) 重播TVB頒獎典禮、台慶

年初一至三呢幾日紅假嘅早上10點幾時間,打開電視都會睇到萬千星輝頒獎典禮、勁歌頒獎典禮、台慶,節目長度剛剛好攝咗個早上時段,又叫做充滿喜氣洋洋嘅氣氛!


預祝大家過一個開心又充滿TVB嘅新年!



標籤: TVB  新年  

留言


請按此登錄後留言。未成為會員? 立即註冊
    快捷鍵:←
    快捷鍵:→