"馬子妮"蔣家旻再次拍《3日2夜》又被指無野好睇?

小眼睛看大娛樂 於 22/04/2019 發表 收藏文章
前日播出《3日2夜》沖繩篇,今次嘅主持係潘梓鋒、蔣家旻一男一女組合,兩人去到沖繩石垣島享受陽光海灘,都有入住無敵海景度假村,又有去海邊玩、做Spa、買當地特色手信等等⋯⋯平時一向被唔少網民討論嘅《3日2夜》,今次竟然回應唔多,係大家對沖繩無興趣,定係大家對蔣家旻(Angel)呢位女主持無興趣呢?

小編都好明白,因為唔少觀眾一見到蔣家旻喺公仔箱出現,就會諗起馬家版《愛回家》嘅角色馬子妮,而且Angel入行12年來多扮過唔少學生妹角色,自然令人覺得有D似大學生去旅行,而唔係度假形式嘅《3日2夜》。加上,Angel身材平平,就未必吸引到男觀眾,但都叫做有新鮮感丫!小編就覺得單純作爲一個旅遊節目,潘梓鋒、蔣家旻呢幾集暫時睇上去都係「稱職」,會令人清楚知道當地係有咩值得玩嘅地方,而唔係睇緊一個美女如雲嘅MV,又唔會好似上一個單元何廣沛、龔嘉欣充滿劇情安排嘅《3日2夜》!


其實除咗呢一集,Angel上一次參與係配上男拍檔楊潮凱,同樣都係一男一女,當時就反而被大家指係一個搞笑旅遊節目。佢地去到一間店鋪食手打烏冬,不過兩人唔係用手,而是用腳「踩」烏冬麵團,配合楊潮凱浮誇嘅動作,都幾有趣!二人事後表示都唔想食有「腳氣」嘅烏冬⋯⋯


就好似小編所講,作爲一個旅遊節目,蔣家旻有份演出嘅《3日2夜》又唔係無野好睇嘅⋯⋯有好笑場面,又有輕鬆介紹景點,為觀眾帶來有新鮮感嘅《3日2夜》,而且本身大家都無對「吸睛度」有太大期待,就認認真真去睇呢一個真 ‧ 旅遊節目!

Ref:TVB

標籤: 3日2夜  蔣家旻  潘梓鋒  TVB  

留言


請按此登錄後留言。未成為會員? 立即註冊
    快捷鍵:←
    快捷鍵:→