【多謝銳哥!】新城獎多又騎呢!力數新城分豬肉頒獎禮之最!

小眼睛看大娛樂 於 09/02/2019 發表 收藏文章
1月先完咗各大頒獎禮,2月又關頒獎禮事?

事關鬧出一單獎座被棄置事件,唔少網民都偵探上身,希望搵得出被棄置喺北角渣華道嘅「新城勁爆躍進歌手」獎座所屬何人!


當年拎呢個獎嘅歌手當堂躍進成嫌疑犯,認真人人自危!5位歌手分別係:吳彤、龍小菌、蔚雨芯、連詩雅、羅力威,各人都分別先後喺社交平台回應,獎項放曬公司或者迷你倉、唔係住事發地方......



佢地嘅解說合唔合理就自有時間去證明,畢竟依家有同獎座合照嘅歌手就係真相!(第一個係龍小菌)


前新城電台台長朱明銳(銳哥)都有發文,呼籲幾位歌手盡早同獎合照,證明自己清白,同時最重要係表現自己對頒獎禮同獎項嘅一份尊重!


當見到商台DJ Colin post出嘅頒獎禮獎座被斷捨離嗰張,小編第一個反應馬上覺得好離譜,當有好多歌手希望拎獎嘅時候,竟然有人會咁夠膽可以隨街dum咗個獎座,就算獎座係膠製定金製,係唔係價值連城都好,佢都係代表自己同幕後團隊嘅努力!

但當下一秒睇真係新城嘅獎座後,小編同樣都有相同嘅感覺,但又忍唔住發出一個會心微笑。因為小編呢幾年都在會場見證新城唔少頒獎嘅時刻,又覺得新城頒獎禮真係別樹一格,當中創造出唔少頒獎禮之最!

1) 「最」多獎

新城頒獎典禮一直都被人感覺係「分豬肉獎」,事關頒獎禮以多獎見稱,真係人人有份、有到有獎、皆大歡喜!獎項數目一直大起大落,由2000年的53個,上升到2005年的125個,高峰期要數到2012年嘅163個獎!其實新城都叫做照顧歌手同粉絲,唔洗大家「坐足幾個鐘」直到2016年開始改革,去年更只頒發61個獎。

單睇新城勁爆歌曲呢個獎中,2005年高達21首,係近呢幾年先至回落翻10首。


2) 「最」照顧國語歌

有別於另外三大頒獎典禮(港台、TVB、商台),新城勁爆頒獎禮自2002年另外分有另一場「新城國語力頒獎典禮」,至2015年停辦。頒獎禮上嘅座上客近8成都係華語歌手,都有一部份有出國語歌嘅香港歌手有份出席「分獎」,小編最印象深刻係現場聽過林俊傑同蔡卓妍合唱《小酒窩》,呢個場面真係好難得!

2014年嘅頒獎典禮台灣男子組合Lollipop F 與一眾英皇歌手都有份出席!



3) 「最」多歌手出席

因為新城頒獎禮唔係好設門檻,只要唱片公司報名,歌手就好大機會得獎,所以新城頒獎典禮真係好似一個音樂界嘅嘉年華會,唔少3、4線歌手都會出席。新城又唔會似TVB音樂頒獎典禮咁只有某幾間唱片公司嘅歌手出現,咗人多都有樣好嘅,歌手可以趁機聚會,大家又可以見證到香港其實仲有好多未走上大舞台嘅歌手、音樂人。(廣東歌不死!)


4) 「最」識細分獎項

新城頒獎典禮一貫喺男、女歌手、新人、組合獎都比較「特別」,無講明金銀銅!

2018年3位勁爆男歌手:

用2018年嘅得獎名單做例子:

‧ 勁爆年度歌手:張敬軒
‧ 勁爆男歌手:陳柏宇、許廷鏗、周柏豪
‧ 勁爆女歌手:鄭欣宜、謝安琪、Gin Lee
‧ 勁爆演繹歌手:謝安琪
‧ 勁爆組合:Dear Jane、Tonick、Supper Moment

又唔會同其他頒獎禮咁單單得一個歌手獎,又或者只係分金、銀、銅3個獎!


5) 「最」騎呢獎項名

小編覺得以下呢幾個獎項名都係奇奇怪怪,唔係唔明白個意思,只係可以有更好嘅選擇呢!

勁爆Hip Hop卓越表現歌手 (會唔會可以改成勁爆Hip Hop歌手呢?)

勁爆十二樂勢力 (勁爆新勢力歌手?)


小編都明白各個頒獎禮都有佢嘅賽制同特色,但綜觀幾個電台嘅頒獎禮,作爲一個頒獎典禮上嘅觀眾,真係覺得新城係比較悶同比較老套!(小編年年都睇到好眼訓!)

Ref: Instagram



如果喜歡我們的文章,請即分享到︰

標籤: 新城  頒獎禮  廣東歌  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→