【終於播完】冇聲冇氣播到大結局,悶走唔少觀眾既《無間道》

講樂‧過路人 於 03/03/2018 發表 收藏文章
劇集版《無間道》播到最後一集,依然冇聲冇氣,雖然話係新年檔期,但埋單成績完全稱唔上理想。

套劇本來雷聲已經唔大,但連雨點都比想像更小,最新一次(12/2至15/2)公布既收視,「跨平台」都只係得20.1點,趁住今晚播映大結局,講講呢套劇集版《無間道》,話晒作為「撈家」劇迷既小弟,都叫睇晒咁多集。

<東網圖片>


劇集主題曲翻唱電影版原曲,都預左冇可能超越劉德華同梁朝偉版本,但都唔好搵任賢齊用「譚仔腔」唱嘛,最搞笑係「小齊」喺套劇度,又另外搵人配音唔用原聲...

<片段:香港討論區Facebook>

至於套劇,原本36集夾硬剪成30集,好多情節都剪到支離破碎,鋪排少左不特止,有時快到連交代都欠奉,好難令人睇得投入。又或者唔應該賴晒後期剪接,因為套劇本身啲情節其實都幾悶,冇乜幾多場真係有緊湊既感覺,幾條感情線亦唔見吸引,更加有啲老套。

keep住睇,其實都係因為羅嘉良。比起舊年回巢拍既《與諜同謀》,今次「撈家」算回復返正常水準,戴左眼鏡既韓朗,亦冇《與》劇咁顯老,不過作為劇中第一大反派,同當年佢飾演既經典奸角徐家立(天地男兒)相比,眼神銳氣始終都係爭咗啲。

<新Monday圖片>

套劇早段有劉松仁同佢鬥下,都算有啲戲味,但後期冇咗「松哥」壓場,就冇咗同級數既對手鬥戲,可觀性大減,只靠一班配角撐場;反而兩位電視劇新丁朱鑑然(飾演洛威)同蘇麗珊(飾演陳玥琪),感覺唔錯。

睇埋個大結局,真係要睇返次電影版《無間道》平衡下...(如果你仲會睇大結局既話)


筆者的Facebook專頁「講樂﹒過路人」,也希望大家多多支持!

https://www.facebook.com/shingster1412/

如果喜歡我們的文章,請即分享到︰

標籤: 無間道  羅嘉良  韓朗  

留言

會員
我要評論
請按此登錄後留言。未成為會員? 立即註冊
  • Li Wing Kin Alfred
    Li Wing Kin Alfred 於 05/03/2018 評論 NO. 1

    已經係唔理套劇咩質素,真係為撈家而睇,好難得可以有得睇佢講廣東話既劇集

快捷鍵:←
快捷鍵:→