【球迷世界】英超Fantasy 第十三周:Wild Card換四將,補入般奴費南迪斯做隊長

講樂‧過路人 於 16/12/2020 發表 收藏文章
可能唔少有玩開「英超Fantasy」的球迷,來到Week 13已經選擇棄game,不過小弟今年想嘗試玩曬整個賽季,所以之後打算得閒而又堅持到的話,每周寫篇點兵前瞻與回顧,為自己與其他玩家增加動力,同時都分享一下每周揀人的點滴。

【本周陣容IN & OUT】

IN:雲比沙卡(曼聯)、般奴費南迪斯(曼聯)、保雲(韋斯咸)、屈堅斯(維拉)
OUT:碧拿歷克(修咸頓)、施耶治(車路士)、祖達、費明奴(利物浦)


施耶治、祖達有傷,人腳不整,本周首次用wildcard,以「Free Hit」補入其他球員,順便執執個陣容,期望搶多幾分。

選用wild card的另一原因,在於原有陣容既對手都唔易踢。修咸頓作客阿仙奴,論近況當然淪為下游的阿仙奴,固然跟前列份子修咸頓無得比,不過「兵工廠」始終是名牌球隊,表現再咁差好難向球迷交代,今仗隨時反底,暫且放棄後防球員碧拿歷克一周。

利物浦上周作客富咸失分,對手踢得好係事實,但全場唔見費明奴製造太多威脅,故此亦棄用。



GK:馬天尼斯(維拉)

早於球季初段,門將位置已選定馬天尼斯同卡斯柏舒米高作輪換,上周兩個同樣力保不失,馬天尼斯單場更有7個撲救,本周維拉VS般尼,李城VS愛華頓,看好馬天尼斯再有clean sheet。

DF:捷維爾(車路士)、基爾獲加(曼城)、雲比沙卡(曼聯)

捷維爾助攻助守,如果無乜傷患,本季諗住長揸;曼城VS西布朗,哥迪奧拿應作輪換,基爾獲加/簡些路只能二選其一;曼聯作客英超攻力最弱的榜尾球隊錫菲聯,唔係咁都要失波嘛?

(P.S. 賽後點評:估你唔到,車路士同曼城最後都分別失分,前者被狼隊絕殺,後者僅能賽和西布朗。車路士失兩球,捷維爾無clean sheet4分仲要倒扣1分;曼城輪換,簡些路戴亞斯正選,結果一個攞黃牌一個own goal,基爾獲加後備上陣反而執返1分)


MF:般奴費南迪斯(曼聯)、孫興民(熱刺)、基亞利殊(維拉)、查洛保雲(韋斯咸)

本周曼聯作客錫菲聯,應該係唔少球迷重心主打,而曼聯最有攻擊力的球員,自然係般奴費南迪斯,wild card換入佢再做埋captain,希望有斬穫。


五度獲選「南韓足球先生」的孫興民,近期狀態大勇;基亞利殊作為維拉隊長,在球隊內的角色相當重要,不時都會交出好表現,兩者皆屬長揸之選;翼鋒查洛保雲似乎深受莫耶斯重用,早前對曼聯相當活躍,更加入左球「詐糊」,主場VS水晶宮,信佢可有一番作為。


FW:屈堅斯(維拉)、班福特(列斯聯)、華迪(李斯特城)

鋒線方面,本來以「卡法路雲(愛華頓)+華迪」作為鐵膽,但見前者近期狀態一般,反而班福特持續有好表現,比較過今周對手,列斯聯VS紐卡素、愛華頓VS李斯特城,似乎班福特更值搏。

以wildcard補入屈堅斯,取代費明奴,看好今屆英超累積6個入球的屈堅斯,可助維拉VS般尼再下一城。(雖然今屆維拉其實好難捉摸XD)

後備:卡斯柏舒米高(李斯特城)、禾特包斯(修咸頓)、簡些路(曼城)、米高堅尼(愛華頓)

最後,仍未棄game的朋友,不妨加入以下聯賽切磋交流。
👉「願贏波歸香港」private league code:eyvr3a

如果喜歡我們的文章,請即分享到︰

標籤: 球迷世界  英超  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→