【求婚大作戰】關於《小小戀歌》,你所聽過的是...

講樂‧過路人 於 22/05/2017 發表 收藏文章
睇過《求婚大作戰》的話,肯定都會記得《小小戀歌》首歌,呢首由MONGOL800原唱既作品,雖然唔係集集出現,但經典程度絕對唔遜色於桑田佳祐既同劇主題曲。除左原唱版既《小小戀歌》之外,唔知大家又有無聽過,以下幾個既翻唱/改編version呢?



最近小弟因為新垣結衣既關係,再次聽返《小小戀歌》呢首歌,事關結衣BB多年前拍攝Walkman廣告時,亦都曾經翻唱過《小小戀歌》。雖然結衣BB唱功唔係出眾,不過呢個廣告Version勝在夠多人,除左結衣之外,仲有3000人齊齊大合唱,就算無左原曲既熱血澎湃,但集合起黎既歌聲,又有種令人覺得好溫暖既震撼。



其實《小小戀歌》都有兩首粵語改編版,其中一首係由「挽歌之聲」填詞既《哈利路亞,CHANCE!》,雖然係網絡作品,但小弟覺得好正,成首歌既feel同MONGOL800原曲都係咁熱血,歌詞亦非常貼近《求婚大作戰》劇情,配合埋剪接畫面,如果喺街度聽住首歌、睇住個MV,絕對係會有種衝動,想跟住啲歌詞唱出黎!


除左呢首高登音樂台既作品之外,流行曲之中亦都林欣彤既《平凡明星》,改編自《小小戀歌》,不過呢首編曲就唔係熱血行先,反而同新垣結衣既翻唱version較為相似,有種溫柔同抒情感覺,題材方面亦同《求婚大作戰》劇情無關,歌詞講述一個樣貌身材都唔突出既女仔,點樣喺歌唱事業做好自己,努力尋求大家既認同,簡單講就係林欣彤既自白,而執筆填詞既係林若寧。



兩首粵語版相比,可能因為先入為主,同比較熱血既關係,小弟始終覺得《哈利路亞,CHANCE!》既歌詞入腦啲,當聽到副歌旋律時,就會不自覺浮現起「張眼,我看見那束光」既歌詞!唔知呢幾個version既《小小戀歌》,大家又會鍾意邊首多啲呢?

<互聯網圖片>



筆者的Facebook專頁「講樂﹒過路人」,有更多廣東歌跟大家分享,希望多多支持!

https://www.facebook.com/shingster1412/


留言


請按此登錄後留言。未成為會員? 立即註冊
    快捷鍵:←
    快捷鍵:→