【四奪最佳填詞人】祝福陳詠謙再攞獎的話，唔使擔心噓聲多過掌聲 精選

剛被網民投選為「2018最討厭樂壇人物」既陳詠謙，轉個頭就攞左吒咤頒發既「最佳填詞人獎」，頒獎禮後關於佢既討論，熱烈程度不下於古天樂。

＜my903商業電台圖片＞

睇返過去幾年既頒獎禮，原來陳詠謙自從2013年至今，已經係第四次攞到呢個獎。

＜香港01圖片＞
能夠以填詞人身份成為網民haters，某程度都唔係容易既事，早排就有篇針對陳詠謙既評論，將佢既歌詞逐首點評，當中既論點都不無道理。

【延伸閱讀】陳詠謙之亂（逆嘶亭）

例如講到陳詠謙填既歌詞，好多時候都會有語病，雖然能夠令你聽得明，但就明得比較轉折，無啦啦塞多個字，又或者減走個字，硬係有啲塞字之感。

不過陳詠謙係咪真係好差呢？又未必。至少，佢填hook line係有啲辦法，否則唔會有「矛盾只因深愛著」、「你快樂過生活，我拼命去生存」之類，入左好多人腦既歌詞。假如閣下填過歌詞，大概會明白呢類看似簡單但又要「中」既歌詞，其實唔係想像中咁容易。
＜香港01圖片＞

得罪講句，唔係個個聽歌既，都會神心得逐句咀嚼，然後再記埋啲歌詞。記低一兩句hook line歌詞，已經足夠用黎做hashtag，何樂而不為？

所以，有一兩句呢類「中」既歌詞，首歌彈出既機會自然大左，成為「十大」既可能性又高左，造就陳詠謙既填詞人獎攞完又攞。
而令小弟開始「留意」陳詠謙既歌詞，其實源自李克勤首《姐姐》。


明明將啲歌詞填得騎呢到不行，但陳詠謙事後繼續死撐「解畫」，話本來就想寫首cult歌，自然惹來唔少網友批評，因為cult既定義，從來都唔係由創作人自行斷定。

所以，陳詠謙攞最佳填詞人，仲要攞過四次，係咪真係冇其他人比佢更值得呢？其實唔係喎，就算唔計神級既黃偉文同林夕，起碼有林若寧、小克、梁栢堅、周耀輝、Tim Lui等等。六年攞四次，係咪真係多咗啲呢？
＜metroPop圖片＞

不過，難得陳詠謙琴晚攞獎個陣，收起平時嗰份招積傲氣，表達來年希望自己作品更立體既願景。

正如佢本人所講，佢真係當今樂壇最幸福既填詞人。祝福陳詠謙下次有機會再攞最佳填詞人獎項時，無須再擔心台下既噓聲大過掌聲。

筆者的Facebook專頁「講樂﹒過路人」，有更多廣東歌跟大家分享，希望多多支持！