【全球發行突破2億冊】當桐谷美玲遇上「柯南之父」青山剛昌

早幾日同朋友無聊講起，有冇鍾意既名人/明星/球星，如果對方喺眼前出現，會好想衝上前同佢講句野，又或者影張合照呢？對於比較內斂同低調既小弟黎講，諗來諗去，會產生呢份衝動同意欲既，可能都係得「柯南之父」青山剛昌。

＜互聯網圖片＞


其實寫呢段引子，都係因為想同大家分享下，呢段「桐谷美玲Ｘ青山剛昌」既片段。

小學年代開始睇青山大叔筆下既柯南漫畫，唔經唔覺將近20年，小學生亦都早已長大成人。即使劇情唔太跟得上，但睇開有感情，睇柯南已經成為某種情意結...


最近因為青山剛昌既漫畫，總發行量突破2億冊(係2億！！)，電視台就搵佢做左個小訪問，由桐谷美玲帶大家參觀青山大叔既工作室。雖然唔多明日文講乜，不過當幻想到柯南呢套漫畫，就係青山剛昌同佢既助手，喺呢個工作室度創作出黎時，就不自覺地有種好神奇既感覺。

＜互聯網圖片＞
然後當青山剛昌將最新劇場版電影《唐紅的戀歌》既原畫，遞畀桐谷美玲過目時，桐谷所流露既眼神，以及「擘大口得個窿」既表情，雖然有多少誇張，不過假如換轉係小弟，相信都會係咁既表情！(據聞桐谷其實都係個柯南迷，亦曾為柯南劇場版配過音XD)

＜互聯網圖片＞

雖然青山剛昌只係個戴住冷帽既大叔，不過小弟真心覺得佢型，型在運用自己既想像力，將小學時期寫既畢業作文，話要成為「偵探漫畫家」既願望實現之餘，仲要將呢個志願發揚到一個極致...

＜互聯網圖片＞

不過再咁繼續連載落去，唔知幾時先可以睇到結局呢？


筆者的Facebook專頁「講樂﹒過路人」，有更多廣東歌跟大家分享，希望多多支持！

https://www.facebook.com/shingster1412/