【今期熱話】當張敬軒都參加《我是歌手》...

講樂‧過路人 於 12/01/2017 發表 收藏文章
唔知大家點睇張敬軒參加《我是歌手5》?睇到呢單新聞後,本來覺得身為英皇旗下歌手,公司又要力谷內地市場,而軒仔本身又係從廣州落黎,參加強國音樂節目都無可厚非...

<互聯網圖片>


但因為參賽既係張敬軒,係曾經就唔同社會不公事發過聲既張敬軒,今次居然推翻自己之前,講過「冇勇氣參加呢類飆高音」既言論參賽之餘,更要另加一篇「愛國論」的千字文,講明自己並非「港獨」份子,好似想同過去既自己劃清界線...換轉係其他歌手,類似舉動大家可能習慣曬,不過當呢個歌手係張敬軒時,始終會有少少失望。

【延伸閱讀】槍頭一致-張敬軒發表愛國論 兩地網民都唔buy (by蘋果日報)


單從音樂角度睇,國內既歌唱比賽節目,撇除矯情元素既話,平心而論,比起香港乏善足陳既音樂節目,肯定更值得參與,亦正如今輯另一位參賽者林憶蓮所講,參加目的係要放低光環,所以就算作為「天后級」人馬,都挑戰自己尋求突破。(當然可觀酬金都會係重要原因..)

【延伸閱讀】《我是歌手》張敬軒證參賽 林憶蓮回應批評:我不喜歡光環 (by立場新聞)

<頭條日報圖片>

不過今時今日,無論原因講得幾動聽,以香港歌手身份北上參賽,已經唔再單純係音樂層面既事,就正如足球場上既「港中大戰」,亦都唔會只係足球層面既事。對於軒仔自打嘴巴參加《我是歌手》,固然會覺得多少愕然,而佢嗰篇慷慨激昂既「愛國論」,更惹人懷疑軒仔係咪已經無左份風骨。

<蘋果日報圖片>


寫呢篇文,其實唔係要批判,或者維護軒仔參加《我是歌手》既決定,而係想分享個人睇法,即使未必每個都同意。老土講句,音樂本來無分界限,希望軒仔今次參賽,唔好因為要迎合內地觀眾,連自己都曾經頂唔順既「鳩唱」,都要攞埋出黎作為賣點。

反而小弟期望既係,軒仔可以好好運用佢既歌唱才華,將大家既注意力拉返去音樂本身,亦希望佢會將廣東歌既優良種子,透過節目既影響力散播。作為香港歌迷,呢種僅有既期望唔算過分,希望軒仔能夠做到。

<互聯網圖片>

筆者的Facebook專頁「講樂.過路人」,有更多廣東歌跟大家分享,希望多多支持!

如果喜歡我們的文章,請即分享到︰

標籤: 張敬軒  我是歌手  林憶蓮  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→