【今期流行】其實滕麗名真係好得!

講樂‧過路人 於 09/07/2016 發表 收藏文章
小弟無乜點追歐陽震華同滕麗名套新劇,唔知點解忽然之間咁多人談論滕麗名,但見到呢位細個就喜歡嘅演員,終於得到遲來但應得嘅人氣,確實幾開心。小弟從來都覺得,以滕麗名嘅條件,本來就值得更多關注,值得更多做第一女主角嘅機會。

<明報圖片>

【延伸閱讀】滕麗名開聲恨攞獎:現在是適合時機

講起「滕麗名」,呢個名真係細細個就成日聽到,從佢個咁特別既姓,已經留低深刻印象,試問大家認識姓「滕」嘅,又有幾多個?應該一隻手都數得晒。

<互聯網圖片>


無論係唱《咕嚕咕嚕魔法陣》,仲未改名叫滕麗名嘅滕麗明,抑或比較冷門D、拍住李克勤罕有做「女一」嘅《師奶強人》慕蓉菲,定係最為人津津樂道嘅經典陳三元,相信滕麗名都唔會係個陌生嘅名字,而滕麗名亦都係小弟細個時,頭三位鍾意嘅女星之一。



不過咁多年以來,滕麗名總係畀人覺得,同「一線」硬係差些少,頂多只係個最佳「第二女主角」,但小弟覺得論演技同樣貌,滕麗名都毫不比其他花旦遜色,只係大家講起滕麗名嘅時候,除左諗起佢做過《陀槍師姐》嘅陳三元,可能就只會係地鐵站經常見到既豐胸廣告,甚或係佢喺感情路上遇人不淑,小弟確實D替佢不值...

<互聯網圖片>


另一件覺得可惜嘅係,滕麗名喺TVB無咩機會唱歌。年輕一輩可能都知道Eason同千嬅係同屆新秀,而其實當年同樣入到決賽嘅,仲有後來去左做電視嘅滕麗名,但滕麗名歷年來唱過嘅歌,除咗幾首兒歌,就只係得幾首兒歌。當聽到有花旦明明唱功差過佢,但都有機會為劇集唱主題曲或片尾曲,就覺得真係嘥咗滕麗名。

<互聯網圖片>


早排重播《尋秦記》,本來就想寫寫滕麗名。當時見到網上有篇文,寫「識揀嘅梗係揀善柔」,小弟深有同感,畀著我係項少龍,如果要喺宣萱、郭羨妮同滕麗名揀一個,我都同樣會揀善柔。

<互聯網圖片>
其實小弟以前有個喜歡對象,外貌同氣質都有幾分似滕麗名,可能因為咁,所以對滕麗名更有好感,而滕麗名確實畀人感覺,總係帶住一份剛中帶柔,呢種特質,比起好多一線花旦都更加charm。

寫完一大篇無謂嘢,最後想講嘅係,視唔視后都好,希望滕麗名從此可以有更多發揮機會,唔好過咗呢陣熱潮後,又再被打回原形,因為滕麗名其實真係好得!


筆者的Facebook專頁「講樂.過路人」,也有更多廣東歌跟大家分享,希望多多支持!

https://www.facebook.com/shingster1412/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 黃煥蝶
    黃煥蝶 於 10/07/2016 評論 NO. 1

    打手文,你收幾多

  • Nsuik Gwen
    Nsuik Gwen 於 11/07/2016 評論 NO. 2

    三元係好正👍🏽👍🏽 但係男仔頭既正

快捷鍵:←
快捷鍵:→