【世界盃雜談】如果真有「魔咒」的話,英格蘭可以走幾遠

講樂‧過路人 於 08/07/2018 發表 收藏文章
有冇一支國家隊,你把口話佢地唔會贏,亦唔係完全捧佢地,但心底裡面其實想佢地贏呢?對於好多香港人黎講,呢隊波可能叫英格蘭。

好似16強對哥倫比亞,踢到互射12碼,心諗都輸左九成九,結果,英格蘭竟然贏左,連英國傳媒既標題都自抽:「你冇眼花,英格蘭真係射贏12碼」。

<Evening Standard圖片>

講真,今屆英格蘭既晉級之路,都無乜贏過強隊,好難講有咩說服力,不過既然連多年來既「互射12碼」魔咒都破解到,好難怪咁多英軍球迷,會覺得今屆可能真係「英格蘭年」。

<互聯網圖片>

當英格蘭8強贏埋瑞典,繼1990年後再次殺入世界盃4強,距離冠軍又近一步。

今次亦都係英格蘭歷史於大賽裡面,第4次殺入準決賽,之前3次只有1次晉級,就係1966年贏世界盃個次。

其實,今屆世界盃剩低既球隊當中,除左法國之外,其餘3隊對上一次踢入世界盃4強,最後都係輸波而回,只能爭季軍。

1986年比利時,準決賽0:2不敵阿根廷,最後殿軍。

1990年英格蘭,準決賽1:1(3:4)不敵西德,最後殿軍。

<互聯網圖片>

1998年克羅地亞,準決賽1:2不敵法國,最後季軍。

如果真係有魔咒呢回事既話,或者可以稱之為「準決賽魔咒」。

比利時贏唔贏到法國就未知,但下線既克羅地亞同英格蘭,肯定有隊可以打破呢個「準決賽魔咒」。

相信有好多香港人都希望,呢隊可以係英格蘭。雖然把口話佢地唔會贏,但心底裡其實想佢地贏,包括小弟。

<互聯網圖片>


標籤: 英格蘭  世界盃  

留言


請按此登錄後留言。未成為會員? 立即註冊
    快捷鍵:←
    快捷鍵:→