腦細你俾得我Claim錢就信我，唔好背後質疑我

打工仔打工有好多尷尬位，其中一樣就係同公司claim錢。
Claim錢，顧名思義就係我哋預先幫公司比左錢先，可以係車錢、可以係飯錢……同借錢一樣，之後公司要比返我哋。

正所謂欠債還錢，天經地義，更何況連繫公司同我哋嘅單位就係錢，唔講錢，唔通同公司講心？

但係同公司有錢銀瓜葛就預左好麻煩，對我哋黎講一分一毫都係錢，有時出job搭巴士，claim 2蚊5蚊，個別每次claim好樣衰，儲埋儲埋唔理個數又不可忽視，所以好多時都會選擇儲到一定數量先claim，一來省卻重覆申請手續嘅麻煩，二來可以唔好比人有錯覺覺得自己「雞毛蒜皮都要計」破壞形象。
自私講句打份工都係想賺錢，無理由幫公司出左錢先唔攞返咁浪漫。

所以有一次阿強攞住一堆claim單想話等腦細簽名，腦細先係左望右望，之後又皺起眉頭，十萬個表情換完又換。

終於佢回魂講左句：「呢度點解會咁貴？搭通宵的士？」

阿強：「腦細你唔記得左嗰幾日我哋team要趕工同等designer出圖咩？」

腦細：「哦又好似係……咁搭的士都可以選擇經東隧唔經西隧掛？西隧貴咁多……搭左成半個月，成日搭的士仲要搭咁貴係咪想增加公司支出？」

（阿強：「你要我哋OT左半個月仲好意思講我哋成日搭的士？」）
最近嗰句阿強當然無講出口啦，最多都係心裡面講幾句粗口……寶寶心裡很委屈，但寶寶不說嘛，打工仔，你懂的。

好彩腦細都有動筆簽名，D錢總算袋袋平安。

但阿強估唔到嘅係佢喺公司嘅pantry聽到腦細問其他同事阿強本身嘅工作量同能力，顯然係質疑阿強有無需要做野做到咁夜搞到要搭通宵的士。

「邊有人會特登拖長D野慢慢做搏的士搭……」阿強心想。

原來就算你點做「形象工程」都好，人哋要講你始終都會講。

有時最委屈嘅唔係同人解釋，而係解釋完簽埋名之後都係唔信你，仲要走去問其他人質疑你嘅能力，對阿強黎講，百辭莫辯同唔信任仲難聽過粗口。