有一種同事係永遠都無手尾

抒文 於 12/01/2017 發表 收藏文章

成日都話識同事好容易,但要識個有手尾嘅同事就真係唔容易。

點解咁講?

咁就要由公司pantry個星盆講起,話說有一日返工嘅時候因為抵唔住眼訓,走左入pantry,想話沖杯茶順便走動下提神,點知唔覺意比我見到星盆隔渣嘅篩有好多飯粒同飯渣,仲要已經「聚飯成塔」,搞到洗手嗰陣去水好慢,仲要有啲渣滓隨水飄浮。

嗰刻真係覺得好嘔心,忍唔住諗:點解咁懶唔清理?你可以喺屋企懶,但公司係公眾地方,你懶你無手尾係會影響其他同事,你唔清理,其他同事更加唔會幫你清理,於是又會再加埋佢自己嘅飯渣,最後只會累鬥累。

之後不自覺就諗起好多無手尾同事嘅事跡,不吐不快。

試過有同事喺雪櫃攞完最後一罐咖啡無放返啲咖啡落雪櫃雪,令其他同事無得飲凍飲。

又試過廁所格裡面啲紙巾,到用剩最後一兩張,寧願掛喺廁紙筒上面都唔會幫手入番一包新嘅落去。

仲有飲水機,明明係最後一個飲哂啲水/見到無水,都會扮睇唔到唔去換,寧願渴死或者行遠啲走去pantry都要等人換,然後等到有人換又會自動識過返去裝水。

講真要有手尾有幾難?洗飯盒跟手清理星盆只係舉手之勞;拎完野飲跟手塞返罐新嘅落雪櫃唔係好浪費energy;用剩1/5廁紙出句聲、攞定卷新嘅方便其他人唔會用太多時間;水機換水都一樣,如果女同事唔夠力都可以請男同事幫忙,幫忙嘅過程仲可以比大家傾下計增進同事之間嘅感情,唔好咩?

難聽少少講句,我哋返工嘅時間分分鐘長過留喺屋企,喺見同事見得多過屋企人嘅情況下,如果大家願意做多少少,既方便大家,又令返工心情好啲,何樂而不為?

問題只係你肯唔肯去做。
標籤: 辦公室  扮工  扮工室  抒文  手尾  

留言


請按此登錄後留言。未成為會員? 立即註冊
    快捷鍵:←
    快捷鍵:→