成長的抉擇:獨家村還是選擇妥協的合群?

抒文 於 11/10/2016 發表 收藏文章

小時候,我們常被長輩灌輸:「要做合群嘅人啊,唔好做獨家村!如果唔係會好慘,會比人隔離乜乜乜。」

慢慢地,我哋將「點都要一齊」呢個概念融入左喺生活上,所以讀書嗰陣,我哋上堂一齊、放小息一齊、食飯一齊、放學一齊、連去個廁所都一齊,以為親密等於唔會孤獨。

不過人大左就會漸漸發現,孤唔孤獨原來唔係簡單有人陪就分到咁容易。如果有人喺你身邊,但性格唔夾、話不投機、貌合神離係咪都代表唔會孤獨呢?又,不知道大家有無試過,日常工作schedule已經好忙好趕,攰得連話也不想說,到了食飯時間想稍稍休息片刻,仍然要堆起塑膠笑容和一班不熟絡或唔岩傾嘅同事講一大堆無意思的說話或搬弄他人的是非?

本身自己的事情已經夠煩心了,卻仍然要應酬這些無意義的交際,為的只是不想被標籤,為的只是不想被看成是獨家村,結果大家一齊食飯,竟變成「累鬥累」,又或變成「同枱食飯,各自手機」。你開始意識到就算有人喺你身邊,如果那些人不合適,即使物理上佔據了你身邊的空間,你仍然會感到孤獨。

與其為相處而相處,倒不如獨處一下,給自己一點私人空間。一個人的空間裡,不需要任何說話、不需要任何諗法、不需要任何表情。只需要好好放空,誠實對待自己的感覺,好好沉澱一下自己的雜絮,其實可以好舒服自在。

呢個世界無人會喜歡孤獨,但與其話不投機,辛苦自己,不如找一個舒服自己的模式,而這些被稱為獨家村的小眾只不過是明白大眾的思想不易改變,不如改變自己,早點想通罷了。 再退一萬步想,獨家村只不過係形容詞,歸納一部分喜歡獨處的小眾。其實任何人都是屬於大眾的,小眾原本也屬於大眾其中一員,只不過大眾愛將小眾標籤化、邊緣化了。小眾,只不過是大眾把不敢接受的事物,歸納成只有少數人喜歡而已。

說到底,獨唔獨家村只係個人的一種取態,不應該有貶意,每個人都有權選擇自己合適嘅方法生活。你喜歡那種生活方式就那種吧,反正打從娘胎,我們就是一個人來到世界上的。
標籤: 抒文  成長  獨立思考  大眾  小眾  

留言


請按此登錄後留言。未成為會員? 立即註冊
    快捷鍵:←
    快捷鍵:→