鄭中基自爆患抑鬱症 依賴酒精逃避現實 將由太太陪同到美國接受戒酒療程 精選 推薦

近日，鄭中基（Ronald）與突然合作超過10年的經理人割席，他昨日（5日）透過機動娛樂發出聲明，指經理人何慶湘小姐已正式離職。Ronald同時透露，在完成《澳娛綜合鄭中基My Only One音樂會》及《Fragments of Wonder 鄭中基世界巡迴演唱會2024高雄安可場》後，他將暫時休息，直至另行通知，原因出於個人情緒及健康問題。

事件引來諸多猜測，Ronald隨後再發長文交代其情緒狀況，自爆患上抑鬱症，雖然有藥物幫助他控制病情，但他仍錯誤地依賴酒精逃避現實，導致其情緒和身體健康大受影響。不過，他特別感激太太的支持，預告太太將陪他到國外接受戒酒療程，一同闖過難關。以下是Ronald發表的全文：

引用大家好。
早前我發咗一個關於我公司同埋我健康嘅聲明，引起咗好多朋友嘅關心亦引起好多嘅猜測。基於公司嘅事情係會如常運作，希望可以好好咁處理再次交代，唔想影響太多人。

今日我想講一下我自己嘅問題。大家平時見到我大癲大肺、拍搞笑戲、開channel拍片、開演唱會，表面上好似無嘢咁。其實咁多年黎我都仲係一個唔識得面對壓力同埋唔成熟嘅人。仲記得2000年我因為喺飛機醉酒鬧事，引致好多我嘅fans失望，仲有影響到我嘅家人，後來我決心戒咗酒，想要做一個清醒嘅人。之後喺無向公眾交代情況下，我經歷咗一段好短嘅婚姻，呢段婚姻令到我好唔開心，亦好好咁反省過自己嘅問題。

直到我遇到我太太余思敏小姐，係佢令我覺得我要走入另一個人生階段嘅人。我哋一起組織咗一個家庭，有兩個小朋友，喺一件好幸福嘅事。

但當面對壓力、面對工作、面對人嘅時候，原來我自己嘅問題係無徹底解決到，好多嘢我都未能做到好好去溝通，好多嘢我都無處理好，令家人失望。

喺搞笑、娛樂大家嘅背後，係朋建議下去咗睇醫生，發現咗有抑鬱症，當時靠食藥控制，然而我再次做咁個錯誤決定，選擇咗飲酒去逃避現實，太太都有同我講，我係自己呃自己。壓力終爆煲，用咗呢幾日時間好好反省自己，工作忙唔係藉口，唔識溝通就要去學識溝通，我覺得好對唔住我屋企人，尤其是我太太同仔女，對唔住！ 我會用時間同行動去證明我會努力做好丈夫、爸爸同鄭中基既呢個決心。

接下來我要去解決自己同公司嘅問題，我完成手上嘅工作後，太太會陪我去美國參加戒酒中心嘅療程，都50幾歲嘞，我要去諗清楚點樣去面對自己，然後先可以面對大家，我希望返黎之後可以做一個更好嘅自己。

呢幾日佔用咗大家嘅時間同埋媒體版面，好對唔住，我希望自己嘅問題真係可以自己去解決，多謝。