梅媽親自否認被禁錮 大爆梅啟明「美國又有蘇州屎仲有兩個仔」 精選

「遺產界KOL」梅艷芳胞兄梅啟明，近年入稟不斷非常繁忙，最近還指控姪兒梅柏麟及梅媽近身看護鄭姑娘禁錮梅媽兼濫用梅媽每月25萬元的生活費，索償合共800萬元。而99歲的「梅媽」覃美金就透過電話接受D100節目《娛樂小奶媽》訪問，親自否認自己被禁錮，並斥：「佢（梅啟明）想禁錮我就真！」

梅媽表示自己想避開梅啟明，因為梅啟明經常找她要錢。提到梅啟明聲稱兒子疑似患癌，望梅媽出錢救急，梅媽就回應：「佢睇咩醫生，畀醫生紙我睇下，我盡我自己可能，幫得多少我都幫。佢而家老婆同仔都唔顧，仲四圍去住攬女人。唉，我都唔識講呀，自己生咗個咁嘅仔。」

梅媽續說：「幾十歲仲去搵女人搞搞震，我啲錢好辛苦㗎，阿梅啲錢係用嚟做生活費㗎咋，我唔係畀你拎出去玩女人㗎！你自己有錢去你就去玩，唔關我事，你好好哋都仲可以，但今時今日我唔會理㗎。我每使一毫子，都係阿梅嘅辛苦錢。」

被問到對於梅啟明「包二奶」有甚麼看法，梅媽立刻火爆回應：「唉，無眼睇，佢有本事佢包10個都唔關我事，但我講明，你玩女人呢，我1毫子都唔會畀錢你。我話明㗎喇，咁佢都係咁做。」梅媽還突然大爆：「美國又有蘇州屎仲有兩個仔，唉陰功囉！」


資料&圖片來源：YouTube@D100 Radio