男童挨跌價值$5萬「天線得得B」玩具 父母即場賠錢 林作：根本可以拒絕賠償 精選

昨日（23日），網上瘋相片及影片，可見1名5歲男童在朗豪坊kkplus玩具店內，挨跌一座1.8米高的「天線得得B」模型，模型倒地毀爛，旁邊有告示寫明「如有損壞 照價賠償」，標價為港幣$52,800。據悉，男童父母即時向店家賠償「成本價」$33,600元。

事後，男童母親在社交媒體發文憶述事件：「我無留意掛住睇野，突然發生好大聲，轉身個公仔爆哂頭，個員工第一句就話我個仔踢個公仔，我同我老公即時賠錢。」男童母親不滿店家誣衊兒子：「我都係收人地send條片先知我鬧錯個仔，咁貴既公仔無鎖住、完全無嘢圍住，我已經覺得好唔合理，我真係覺得好離譜。可以話佢唔小心，但屈佢踢直頭覺得詐騙，埋單三萬幾，我真係心理壓力好大，以後都唔敢行街。」
逢水必抽的林作表示收到男童家長的聯絡，向他諮詢是否應該賠錢。林作在社交媒體寫道：「本人認為，家長完全有得打，根本可以即場拒絕賠償，並邀請商家向家長提出控告，反正區區幾萬元，只能上小額錢債。陸偉雄話小孩及家長都沒有法律責任，但我恐怕在現場的家長，即使本身是律師都未必熟悉這個涉及小孩的法律。但法律從來不僅僅是知識。做過大律師的人就知道，更加是法律上和法律外的策略。如果用拖字訣，就等佢吿去小額錢債，可能已經會因為廢事煩而不了了之。而且，之後得知更好的法律意見後，更是可能在小額錢債上完勝。」
後來，kkplus就事件發出聲明，指出事發後已即時處理並在雙方同意下徹底解決，處理方法是由事主主動提出。不過，kkplus強調，該擺設從去年11月開始已於現位置展示，期間並沒有為客人帶來任何不便，但會重新審視所有擺設的展示安全。

林作評論指：「賭幾多都得，個家長一定會攞番錢。我一定會為民請命。」林作還借事件「Sell保險」：「如果當年你有同我幫個仔買教育基金，今日你出事，就會第一時間打俾我問我點算。你打俾個律師friend都可能唔得閒睬你，但係我嘅工作就係睬人，所以我一定會即場幫你拆掂佢。咁妳就唔洗破財啦！」

資料&圖片來源：IG@jolamchok